Sigurvegarar Gulleggsins 2008, Eff2 technologies, ásamt stofnendum Innovit. F.v. Magnús Már einarsson, Andri Heiðar Kristinsson, Kristleifur Daðason, Friðrik Heiðar Ásmundsson, Herwig Lejsic og Stefanía Sigurðardóttir.

Gulleggið 2009, frumkvöðlakeppni Innovit stendur nú sem hæst og vinna 122 hópar og einstaklingar af fullum krafti að þróun og framgangi sinna viðskiptatækifæra.

Frumkvöðlakeppnin, sem hófst í janúar og stendur fram í lok mars, er skipt upp í þrjá áfanga. Í þeim fyrsta skiluðu þátttakendur inn stuttri lýsingu á viðskiptahugmynd sinni, í öðrum áfanga er fullmótuðuð viðskiptaáætlun send inn. Efstu keppendur sem komast í úrslitaáfangann kynna loks og verja hugmyndir sínar fyrir dómnefnd og fjárfestum.

Frumkvöðlakeppni Innovit er haldin að fyrirmynd sambærilegrar keppni við MIT háskóla í Bandaríkjunum en sú keppni ein og sér hefur skapað þúsundir starfa og verið stökkpallur fyrir ný sprotafyrirtæki sem samanlagt eru verðmetin á yfir 20 milljarða bandaríkjadala.

Keppnin er fyrst og fremst stökkpallur fyrir framúrskarandi viðskiptahugmyndir og vettvangur þjálfunar og tengslanets fyrir íslenska háskólanemendur, nýútskrifaða og frumkvöðla. Með öflugum stuðningi, námskeiðum og ráðgjöf sem keppendum stendur til boða samhliða keppninni er það markmið Innovit að skapa grundvöll fyrir nýjum fyrirtækjum og verðmætasköpun á Íslandi.

„Það er frábært að sjá hversu mikil frjósemi einkennir keppendur í frumkvöðlakeppninni í ár og hve fjölbreyttar viðskiptahugmyndirnar eru. Fjöldi þátttakenda fór fram úr okkar björtustu vonum og er töluverð aukning frá því á síðasta ári. Nú þegar hafa mörg fyrirtæki verið stofnuð í kjölfar keppninnar sem fór fram í fyrsta sinn árið 2008 og skapað fjölmörg ný störf fyrir vel menntaða íslendinga. Gulleggið er að okkar mati tákn nýrra tíma og táknar nýtt líf, nýjar og ferskar hugmyndir sem enn eru óskrifað blað en eru við það að brjótast út úr skurninni og líta dagsins ljós, vaxa og dafna. Það verður svo sannarlega spennandi að fylgjast með framvindunni í ár og sjá ný fyrirtæki blómstra á næstu árum,“ segir Andri Heiðar Kristinsson, framkvæmdastjóri Innovit.

Lýsing á viðskiptahugmyndum í Gullegginu 2009