Töluverðar skemmdir hafa verið unnar á húsinu. mynd/bb.is

Skemmdarverk ungra drengja á norðurgafli gamla Kaupfélagshússins á Ísafirði náðist á eftirlitsmyndavél í gær. Jóhann Bæring Gunnarsson, umsjónarmaður eigna Ísafjarðarbæjar, segir drengina hafa klifrað upp vegginn og spyrnt sér af honum og þannig brotið plötur sem eru á klæðningu hússins.

„Þeir hlaupa upp með veggnum og spyrna sér svo frá og brjóta þannig plöturnar. Þetta er eitthvað sem er innleitt frá útlöndum. En þeir eru ekki að klifra upp í fimm metra hæð. Þær plötur sem brotna þar er eftir grjótkast,“ segir Jóhann Bæring.

Hann segir skemmdarverkum á húsinu hafa snarfækkað eftir að eftirlitsmyndavél var sett við húsið.

Í Evrópu er íþróttin Parkour stunduð en hún gengur út á að koma sér frá staðsetningu A til staðsetningu B á sem skemmstum tíma, án utanaðkomandi hjálpar. Menn klifra á ógnarhraða upp veggi og stökkva á milli bygginga. Annað birtingarform af Parkour er Yamakazi og er stundað í Frakklandi og birtist í kvikmynd sem náði töluverðum vinsældum á Íslandi. Þar trúa menn á algjört frelsi hreyfingarinnar og stökkva á milli bygginga og klifra upp veggi, en gera það með meiri tilburðum og brögðum en í Parkour. Einnig kom út tölvuleikur á síðasta sem heitir Mirror´s edge sem gengur út á að klifra upp veggi og hlaupa með þeim.