Sjö verkefni hlutu í dag styrki frá Samtökum iðnaðarins til námsefnisgerðar fyrir iðngreinar og aðrar greinar er varða iðnað. Alls námu styrkirnir 6,5 milljónum króna.

Frá ársbyrjun 2006 hafa Samtök iðnaðarins styrkt ein 26 útgáfuverkefni á sviði kennslugagna fyrir greinarnar. Til þessa hafa Samtökin varið rúmlega 26 milljónum króna, eða að jafnaði einni milljón króna á verkefni. Samtökin styrkja í hæsta lagi helming hvers verks.

Verkefnin eru fjölbreytt. Þau eru ýmist frumsamin eða þýdd og flest gefin út með hefðbundnum hætti sem innbundnar bækur. Sum eru eingöngu ætluð til netútgáfu. Meðal annars hafa verið styrkt verkefni í byggingariðnaði, málmiðnaði, garðyrkju, rafiðnum, pípulögnum, öryggismálum, gæðastjórnun og  mannauðsstjórnun.

Þessir hlutu námsefnisstyrk SI 2009:

IÐAN fræðslusetur, 700.000 krónur, fyrir kennsluefni til að þjálfa tilsjónarmenn í vinnustaðanámi.

IÐNÚ bókaútgáfa fyrir úttekt á stöðu námsefnis og námsefnisgerðar fyrir iðn- og starfsgreinar á Íslandi, 800.000 krónur, útgáfa á námsefni fyrir snyrtifræði, 1.000.000 krónur og útgáfa á námsefni fyrir rafiðngreinar, 2.000.000 krónur.

Félag húsgagna- og innréttingaframleiðenda, 1.000.000 krónur, fyrir Kennslubók í húsgagnasmíði.

Menntaskólinn í Kópavogi, 500.000 krónur, fyrir verkefni um að koma prentuðu kennsluefni í matvælagreinum í vefrænt form.

Horticum Menntafélag, 500.000 krónur fyrir Kennslubók í skrúðgarðabyggingafræði

Engin formleg úrræði eru fyrir útgáfu á námsefni fyrir atvinnulífið. Ríkið greiðir fyrir kennslu iðn- og starfsgreina og ber ábyrgð á lögum og reglugerðum um slíkt nám. Hins vegar er námsefnisgerðin að heita má munaðarlaus. Samtök iðnaðarins styrkja þessa námsefnisgerð í þeirri von og trú að aðrir aðilar, þ.m.t. hið opinbera, leiki með og veiti sömuleiðis fjármagni til.

„Það væri engin námsefnisútgáfa fyrir smærri iðngreinar hér á landi nema styrkir Samtaka iðnaðarins kæmu til. Þeir skipta öllu máli fyrir þessar iðngreinar,“ segir Erling R. Erlingsson, framkvæmdastjóri Iðnú.

Hann segir að upplýsingar fyrir námsefnið séu ekki til á einum stað hér á landi og þurfi að safna saman svo það geti nýst til námsefnisútgáfu eða til kennslu í öðrum skólum.

„Hvað varðar snyrtifræði hefur aldrei verið til námsefni á íslensku og ekki auðvelt að styðjast við erlent efni þar sem kennslan hér er það frábrugðin því sem gerist erlendis. Auk þess eru nemendur hér á landi almennt eldri,“segir Erling R. Erlingsson.

„Þessi styrkur nýtist okkur mjög vel í tengslum við námskeið fyrir tilsjónarmenn á vinnustöðum sem við hófum á síðasta ári. Styrkurinn fer í að þróa og gefa út kennsluefnið. Við erum alltaf að reyna að leggja áherslu á gæði vinnustaðanámsins,” segir Hildur Elín Vignir, framkvæmdastjóri Iðunnar.

Sérstök nefnd á vegum Samtakanna leggur fram tillögur að styrkjum til stjórnar SI. Í henni eru Halla Boga, gullsmiður og framkvæmdastjóri listmunaverslunarinnar KRAUM, Baldur Gíslason, skólameistari Iðnskólans í Reykjavík og Ingi Bogi Bogason, sviðsstjóri menntunar og mannauðs hjá SI.