Andrés Magnússon, framkvæmdastjóri Samtaka verslunar og þjónustu (SVÞ), segist ekki vera sammála því mati starfsbróður síns, Knúts Signarssonar, framkvæmdastjóra Félags íslenskra stórkaupmanna, að orðspor íslenskra fyrirtækja á erlendum vettvangi sé horfið. Haft var eftir Knúti í Morgunblaðinu á þriðjudag að íslenskir heildsalar fengju ekki afgreiddar vörur erlendis nema gegn staðgreiðslu.

Andrés segir að vissulega glími íslensk fyrirtæki við margvísleg vandamál í sínu rekstrarumhverfi, tengd háum vöxtum, gengi gjaldmiðla og bönkunum. Einnig hafi fyrstu vikurnar eftir hrun bankanna í október gengið erfiðlega að fá vörur afgreiddar og fluttar til landsins.

„Lýsing Knúts er hins vegar í engum takti við það sem ég heyri á mínu liði. Ég hafði samband við tíu fyrirtæki innan okkar vébanda, í ýmsum geirum, og nær undantekningarlaust er staðan þannig að allir hafa náð góðum samningum við sína birgja erlendis. Eitt þeirra er í viðskiptum við 150 birgja og hefur haldið öllum sínum samböndum,“ segir Andrés og vísar jafnt til lítilla sem stórra fyrirtækja sem flytja inn olíuvörur, ritföng, lyf, mat og ýmsar fleiri vörur. Reynsla félagsmanna SVÞ sé því almennt góð og ekki skipti máli í hvaða löndum birgjarnir eru.

Margrét Kristmannsdóttir, framkvæmdastjóri Pfaff og formaður Félags kvenna í atvinnurekstri, tekur undir með Andrési. Orðspor íslenskra fyrirtækja sé langt í frá horfið. Hún viti ekki betur en flest fyrirtæki hafi náð að semja við sína birgja.

„Ég drega enga dul á að rekstrarumhverfið er erfitt en það eru allir að leggjast á eitt að koma okkur í gegnum þetta. Fylgst er náið með okkur og við þurfum líka að halda okkar birgjum vel upplýstum.“