Ögmundur Jónasson talar á Alþingi. mbl.is/ÞÖK

Vanskil stofnana í heilbrigðiskerfinu, gagnvart Landspítalanum, nema 550 milljónum króna. Það eru vanskil sem bera dráttarvexti. Þetta kom fram í munnlegri skýrslu heilbrigðisráðherra, Ögmundar Jónassonar, á Alþingi í dag. Kallaði hann þetta feluleik í kerfinu, og sagði að það kallaði á uppstokkun. Tók hann sem dæmi að St. Jósepsspítali - Sólvangur í Hafnarfirði, sé í 60 milljóna króna vanskilum við spítalann vegna veittrar þjónustu.

Þá sagði Ögmundur það lengi hafa verið opinbert leyndarmál að læknar þiggi margir afar háar greiðslur, í gegnum einkahlutafélög, sameignarfélög eða samlagsfélög, fyrir veitta sérfræðiþjónustu. Sagði hann dæmi um að sameignarfélag læknis hafi fengið 24 milljónir króna í nettó greiðslur á einu ári fyrir venjulegt starfshlutfall, og að á síðasta ári hafi einkahlutafélag læknis fengið í greiðslur 3 milljónir króna, fyrir einungis 10% starfshlutfall. Sagðist Ögmundur finna til samkenndar með þeim sem reki St. Jósepsspítala en að fyrirkomulag eins og þetta gangi ekki. Hann lýsti yfir furðu sinni á því að svona kerfi hafi fengið að blómstra án þess að forveri hans, Guðlaugur Þór Þórðarson, hefði tekið á málinu.

Ásta Möller, þingmaður Sjálfstæðisflokksins tók undir með Ögmundi hvað varðar þessar greiðslur til félaga í eigu lækna og kallaði þau ofurlaun. Hún sagði það rekstrarform sem viðhaft hafi verið á St. Jósepsspítala það versta sem hægt sé að hugsa sér, þ.e. að blanda saman einkarekstri og opinberum rekstri á þann hátt. Að öðru leyti gagnrýndi hún ræðu Ögmundar og sagði hana hafa verið rýra í roðinu, auk þess sem hann hefði veist að fyrrverandi ráðherra með ómaklegum hætti. Hann hefði m.a. ekki lagt fram nein haldbær rök fyrir því að sveigja af þeirri braut sem fyrri ráðherra hafði markað, um hagræðingu í heilbrigðiskerfinu.