mbl.is/Arnaldur

Öllum starfsmönnum Fréttablaðsins veður gert að minnka starfshlutfall sitt niður í 90% frá næstu mánaðamótum. Um tímabundna aðgerð er að ræða eða til 1. september. Þá var fjórum blaðamönnum á Fréttablaðinu sagt upp í dag. Ari Edwald, forstjóri 365 miðla segir að tugir milljóna sparist á árinu með þessum aðgerðum á Fréttablaðinu.

Starfsmönnum Fréttablaðsins voru í dag kynntar nýjar tillögur að hagræðingaraðgerðum á blaðinu. Þær koma ofan í aðgerðir sem hrint hefur verið í framkvæmd síðust vikur og mánuði hjá Fréttablaðinu.

„Við erum ekki að leggja niður neina starfsemi hjá okkur, við hlúum að flaggskipunum okkar í öllum megingreinum miðlunar en við erum stöðugt að velta öllum steinum til þess að leita leiða til að spara og hagræða,“ segir Ari Edwald, forstjóri 365 miðla.

Fyrirtækið var með þeim fyrstu sem gripu til launalækkunar í kjölfar bankahrunsins í október. Frá og með fyrsta nóvember sl. tóku allir starfsmenn með 300 þúsund krónur og þar yfir í mánaðarlaun, á sig launalækkun. Þeir sem höfðu 500 þúsund króna laun og þar yfir lækkuðu um 10% en laun á bilinu 300 þúsund til 500 þúsund lækkuðu hlutfallslega minna. Þá var sunnudagsútgáfu Fréttablaðsins hætt um miðjan janúar og er nú gefið út eitt helgarblað.

Ari Edwald segir að stöðugildum hjá miðlum 365 hafi fækkað úr 370 í tæplega 300 síðasta rúma árið. Miðlum hafi hins vegar ekki fækkað.

Ari Edwald, forstjóri 365 miðla. mbl.is/Ómar