Gylfi Arnbjörnsson, forseti ASÍ kynnti hugmynd að frestun umsaminna launahækkana á formannafundi 16. febrúar sl. mbl.is/Ómar

Alþýðusambandið og Samtök atvinnulífsins ræða nú hvort og þá með hvaða hætti væri hægt að hækka lægstu laun strax. ASÍ og SA hittust á samningafundi í gær til að ræða hvort hægt sé að mynda samstöðu allra heildarsamtaka beggja vegna borðs á vinnumarkaði, ásamt komandi ríkisstjórn um þróun kjarasamninga til næstu tveggja ára. Fulltrúar ASÍ og SA þinga aftur á morgun.

Fulltrúar ASÍ og SA hittust í gær til að ræða hvort vilji væri til að framlengja líf núverandi kjarasamnings og hvernig gengið yrði frá launahækkunum og umsömdum kjarabótum.

Talsmenn Samtaka atvinnulífsins hafa sagt að ekki sé lag til að standa við umsamdar launahækkanir sem koma eiga til framkvæmda 1. mars. hins vegar hafa Samtök atvinnulífsins viðrað þá hugmynd að aðilar vinnumarkaðarins, ásamt komandi ríkisstjórn, móti sameiginlega áætlun til næstu tveggja ára, þar sem m.a. er tekið á endurskoðun kjarasamninga. Þessi hugmynd Samtaka atvinnulífsins er þó háð því að verkalýðsfélögin fallist á frestun umsaminna launahækkana.