Eftir Jón Pétur Jónsson

Fjallað var um stöðu Icesave-málsins á fundi utanríkismálanefndar í morgun. Fjármálaráðherra var viðstaddur fundinn og gerði grein fyrir stöðunni og skipan nýrrar viðræðunefndar, sem Svavar Gestsson fer fyrir. Árni Þór Sigurðsson, formaður nefndarinnar, segir að enn ríki enn óvissa um það hve há fjárhæð muni falla á íslenska skattborgara vegna Icesave-reikninganna. 

Morgunblaðið greindi nýverið frá því að skilanefnd Landsbankans reikni með því að um 72 milljarðar króna muni falla á íslenska skattgreiðendur vegna Icesave-reikninga bankans í Bretlandi og Hollandi.

„Þessar tölur um umfangið á Icesave-skuldbindingunum upp á einhverja 600 milljarða þær í sjálfu sér standa. Að hve miklu leiti það fellur á okkur og hvað eignirnar, sem eru á móti, verða miklar, það er fullkomin óvissa um það,“ sagði Árni Þór hins vegar í samtali við mbl.is að loknum fundi utanríkismálanefndar.

„Við vitum hver brúttóskuldbindingin út af Icesave-reikningunum er. Hún hefur ekkert breyst. En hver nettóstaðan verður, það er mikil óvissa um hana,“ segir Árni Þór. Aðspurður segir hann nefndarmenn almennt sammála um það.

Hann telur líklegt að næsti viðræðufundur vegna málsins verði um miðjan mars. Hins vegar liggi ekki fyrir hvenær málið verði endanlega til lykta leitt.

Árni Þór Sigurðsson.