Sundahöfn. Mikill áhugi hefur verið á lóðum á hafnarsvæðinu.

Eftir Sigtrygg Sigtryggsson - sisi@mbl.is

Í lóðaskilmálum Faxaflóahafna sf. og Reykjavíkurhafnar þar áður hafa um langt skeið verið ákvæði sem gefa lóðarhafa færi á að skila lóðum eða höfninni heimild til að innleysa lóðarvilyrði, segir Gísli Gíslason, hafnarstjóri Faxaflóahafna.

„Þetta er gert til þess að tryggja eðlilegan hraða á uppbyggingu hafnarsvæða, en uppbygging þeirra og nýting tengist að sjálfsögðu hafnarstarfseminni, þ.e. inn- og útflutningi,“ segir Gísli.

Hörð gagnrýni Brimborgar

Egill Jóhannsson, forstjóri Brimborgar, hefur gagnrýnt harðlega að Eimskip fái að skila lóð í Reykjavík á sama tíma og Brimborg hefur ekki fengið að skila lóð og fær ekki gatnagerðargjöld endurgreidd.

Egill hefur bent á, að sömu borgarfulltrúar sitji í borgarráði og í stjórn Faxaflóahafna. Í borgarráði segi þeir nei en já í stjórn Faxaflóahafna. Borgin eigi 75% hlut í Faxaflóahöfnum og því eigi öll fyrirtæki að sitja við sama borð varðandi skil á atvinnulóðum.

„Mér er ekki kunnugt um með hvaða hætti Reykjavíkurborg hagar lóðaskilmálum sínum en ætla má að þeir séu mismunandi eftir því með hvaða hætti lóðum er úthlutað. Hjá Faxaflóahöfnum sf. eru hins vegar sömu skilmálar sem gilda hvort heldur er á hafnarsvæðum í Reykjavík eða á Grundartanga,“ segir Gísli.