Meðferðarstöð SÁÁ, Vogur mbl.is/Árni Sæberg

36 ný tilfelli af lifrarbólgu C fundust á Sjúkrahúsinu Vogi á síðasta ári. Það er heldur minna en undanfarin ár. 1122 einstaklingar sem hafa sprautað sig í æð hafa komið á Sjúkrahúsið Vog á síðustu 5 árum. Gerð hafa verið skimunarpróf fyrir alnæmissmiti hjá nær öllum án þess að ný tilfelli af alnæmissmiti hafi fundist meðal þeirra. Þetta kemur fram á vef SÁÁ.

„Það eru gleðitíðindi að ekki skuli hafa fundist ný tilfelli af alnæmissmiti á Sjúkrahúsinu Vogi á árinu 2008. Nokkur umræða var um það á síðasta ári að algengi á alnæmissmiti meðal sprautufíkla á Íslandi væri að stóraukast. Ekki fundust marktækar vísbendingar um það á Vogi árið 2007. Þá greindust tvö ný tilvik af alnæmissmiti.

Við nánari athugun kom í ljós að annar einstaklingurinn hafði ekki fengið smit og hinn einstaklingurinn hafði ekki sprautað sig í æð svo vitað sé. Síðan er liðið rúmt ár og ekkert nýtt tilfelli af alnæmissmiti hefur greinst meðal sprautufíklanna á Vogi," að því er segir á vef SÁÁ.

 Lifrarbólga C er algengasti alvarlegi fylgikvilli sprautufíknar og smitast vegna þess að sprautufíklarnir sprauta sig með óhreinum áhöldum þó að tiltölulega auðvelt sé að verða sér út um hrein áhöld.

 15 % allra sprautufíkla smitast af lifrarbólgu C í fyrstu 10 skiptunum sem þeir sprauta sig. 60% allra sprautufíkla sem hafa sprautað sig reglulega í eitt ár hafa smitast og 80 % af þeim sem hafa sprautað sig reglulega í meira en 2 ár hafa fengið lifrarbólguna.  Í 80% tilvika verður sýkingin langvin. Meðferð við sýkingunni er kostnaðarsöm og fyrirhafnarmikil og stundum óþægileg fyrir sjúklingana, samkvæmt vef SÁÁ.