Vetrarveður á Ísafirði Halldór Sveinbjörnsson - bb.is

Víðast hvar er orðið ófært á norðanverðum Vestfjörðum og alls ekkert ferðaveður.

Lögreglan á Ísafirði hefur í samráði við Veðurstofu Íslands rýmt atvinnuhúsnæði fyrir neðan Grænagarð á Ísafirði og starfsmönnum Netagerðarinnar, Eyrarsteypu og KNH verið gert að yfirgefa vinnustaðinn. Að auki hefur starfsmönnum sorpbrennslustöðvarinnar Funa í Engidal verið ráðlagt að vera ekki við vinnu utan varnargarðsins.

Einnig hefur Veðurstofan farið fram á rýmingu í Fremstu-húsum í Dýrafirði, Geirastaði í Syðridal, Höfða og Kirkjubæ í Skutulsfirði, Tankinn innan Flateyrar og Hraun í Hnífsdal. Verið er að athuga með viðveru í Fremri- og Neðri-Breiðadal og að Kirkjubóli í Korpudal í Önundarfirði. Hættustigi var lýst yfir Bolungarvík í gærkvöldi og þurftu fjórtán íbúar fimm húsa við Ljósaland og Traðarland að yfirgefa heimili sín.

Skólahaldi hefur verið aflýst í grunnskólum svæðisins auk þess sem kennsla fellur niður í Tónlistarskóla Ísafjarðar. Söfnum Safnahússins á Ísafirði og versluninni Konur og menn hefur verið lokað í dag.

Vegna veðurs og ófærðar hefur eftirfarandi íþróttamannvirkjum í Ísafjarðarbæ verið lokað það sem eftir lifir dags:
Sundhöll Ísafjarðar
Íþróttahúsinu Austurvegi
Íþróttahúsinu á Torfnesi
Íþróttamiðstöðinni á Suðureyri
Skíðasvæðunum í Tungudal og á Seljalandsdal.
 

Í morgun féll lítið snjóflóð á stálþil í Eyrarhlíð. Þá féll þunnt flóð yfir Hnífsdalsveg nálægt brekkunni við Hraðfrystihúsið.

Veðurspá Veðurstofunnar sem gildir til klukkan 18 á morgun gerir ráð fyrir norðaustan og norðan 18-25 m/s og snjókomu. Dregur úr vindi og ofankomu í kvöld og nótt. Norðaustan 10-15 m/s í fyrramálið og dálítil él, en hægari seint á morgun. Frost verður á bilinu 1 til 6 stig.