Í bréfi sem Morgunblaðinu hefur borist frá Björgólfi Thor Björgólfssyni, segir að umfjöllun í Kastljósi á mánudagskvöld um málefni Landsbankans hafi verið ónákvæm og villandi.

Með framsetningunni sé augljóslega látið í það skína að Björgólfur Thor hafi farið með rangt mál og að það virðist vera inntak frásagnarinnar. „Hið rétta er að svör FSA og breska fjármálaráðuneytisins segja ekkert til um hvort orð mín standist eður ei. Hinsvegar hafa stjórnendur Landsbankans staðfest þau með formlegum yfirlýsingum mínum,“ segir í bréfi Björgólfs.

Viðræður en ekki samkomulag

Björgólfur segir rangt með farið að hann hafi í Kompásviðtali á Stöð 2 sl. haust sagt að Landsbankinn hafi gert samkomulag við breska fjármálaeftirlitið (FSA) um að taka Icesave innlánareikningana með flýtimeðferð inn í dótturfélag bankans í Bretlandi og þar með koma ábyrgðum á þeim reikningum í lögsögu breskra yfirvalda.

„Í kynningu á innslagi Kastljóss er fullyrt um samkomulag, í umfjölluninni sjálfri er þrisvar sinnum talað um samkomulag og þar er mér m.a. lagt í munn að hafa fullyrt um samkomulag og í fréttum Sjórnvarpsins er einnig staðhæft að ég hafi talað um samkomulag. Hið rétta er að ég talaði aldrei um samkomulag. Ég talaði um að viðræður hefðu átt sér stað við FSA og í samtölum stjórnenda bankans við starfsmenn þess hefði komið fram að ef Landsbankinn gæti greitt 200 milljónir sterlingspunda til Bretlands á mánudeginum væri FSA reiðubúið að veita flýtimeðferð (e. fast track) á Iceasave reikningunum inn í breskt dótturfélag bankans. Landsbankanum var því boðin flýtimeðrferð gegn því að greiða 200 milljónir sterlingspunda en þar sem bankinn fékk ekki fyrirgreiðslu varð ekkert úr mögulegu samkomulagi,“ segir í bréfinu frá Björgólfi.

Hann segir þennan grundvallarmun á orðum sínum og röngum fullyrðingum Kastljóss mjög mikilvægan, einkum þegar svar FSA og breska fjármálaráðuneytisins sé skoðað í heild. Fyrirspurn íslenska fréttamannsins hafi verið margræð og því komi svar fjármálaráðuneytisins og FSA ekki á óvart. Ráðuneytið vísi til þess að ekki hafi verið sá skilningur sem lýst sé í fyrirspurninni en svarið útiloki þó ekki að Landsbankinn hafi átt í viðræðum þeim sem fyrr er lýst við FSA.

„Fyrrgreind umfjöllun hefur verið meiðandi og er þess farið á leit við Kastljós og fréttastofu Sjónvarps að villandi og ónákvæm umfjöllun um orð mín verði leiðrétt í kvöld á sama vettvangi og í gærkvöldi [mánudagskvöld],“ segir í bréfinu.