Frá Ísafirði. Ómar Óskarsson

Héraðsdómur Vestfjarða sýknaði nýlega ungan karlmann af ákæru um ölvunarakstur og umferðarlagabrot, með því að hafa í mars í fyrra ekið bíl  undir áhrifum áfengis og án þess að hafa öðlast ökuréttindi, frá Ásgeirsbakka og að bifreiðastæði við Hótel Ísafjörð þar sem lögreglan hafði afskipti af honum.

Maðurinn var á tónlistarhátíðinni Aldrei fór ég suður ásamt bróður sínum. Í lok hátíðarinnar fengu þeir allsgáðan pilt, sem þeir könnuðust við, til að aka bílnum að hótelinu. Þegar þangað var komið fór ökumaðurinn á dansleik en sá ákærði færði sig yfir í ökumannssætið þar sem hann sat við hlið bróður síns og sötraði bjór og hlustaði á tónlist á meðan þeir biðu eftir félaga sínum. Kom þá lögreglan að en henni hafði verið tilkynnt um að mjög ölvaðir piltar hefðu sest upp í bíl og óttast væri að þeir myndu aka af stað. 

Maðurinn neitaði sök og bróðir hans staðfesti vitnisburð hans. Taldi dómurinn að ákæruvaldinu hefði ekki nægilega tekist að sanna sekt mannsins gegn neitun hans. Var hann því sýknaður.