Ófært er á milli Ólafsfjarðar og Dalvíkur vegna snjóflóðs sem féll á veginn, samkvæmt upplýsingum frá Vegagerðinni. Mjög slæmt ferðaveður er víða, mjög hvasst er á Kjalarnesi og segir í fréttaskeyti Vegagerðarinnar að þar sé óveður. Ófært og stórhríð er á Fróðárheiði. Óveður er í Staðarsveit. Á Suðurlandi er víða hálka eða hálkublettir þó aðallega í uppsveitum.

Á Vesturlandi eru víðast hálka, hálkublettir og skafrenningur. Hálka og skafrenningur er á Bröttubrekku og á Holtavörðuheiði. Ófært og stórhríð er á Fróðárheiði. Óveður er í Staðarsveit.

Á Vestfjörðum er þæfingsfærð í Ísafjarðardjúpi og þungfært er á Steingrímsfjarðarheiði og á Ströndum. Ófært er um Klettsháls, en mokstur stendur yfir á þessum leiðum.

Á Norðurlandi er víða hálka, hálkublettir, snjóþekja, éljagangur og skafrenningur. Ófært er um Þverárfjall en mokstur stendur yfir. Þungfært og stórhríð er í Víkurskarði og að Grenivík. Ófært er á milli Dalvíkur og Ólafsfjarðar vegna snjóflóðs.

Á Norðausturlandi er víða þæfingsfærð. Þæfingsfærð er á Tjörnesi og ófært er um Hólasand. Óveður og þungfært er á milli Vopnafjarðar og Þórshafnar, ófært er um Melrakkasléttu og þungfært er um Hálsa. Ófært er um Vopnafjarðarheiði og þungfært er um Möðrudalsöræfi og beðið er mokstur. Óveður er á Mývatnsöræfum.

Á Austurlandi er hálka,snjóþekja og éljagangur. Ófært er um Fjarðarheiði og Vatnsskarð eystra og beðið er með mokstur þar. Þæfingsfærð er á Fagradal og í Oddskarði. Ófært er um Breiðdalsheiði.

Á Suðausturlandi eru hálkublettir og einhver skafrenningur.