Úr myndasafni. Sverrir Vilhelmsson

Skemmtanahald var víðast hvar með rólegra móti á landinu í nótt. Á suðurlandi dró helst til tíðinda í umdæmi lögreglunnar á Selfossi. Þar var einn maður tekinn við ofsaakstur á Hellisheiðinni í nótt. Hann ók á 158 kílómetra hraða á klukkustund. Einnig voru tveir ökumenn teknir vegna ölvunar við akstur og einn þurfti að gista fangageymslur vegna slagsmála og eignaspjalla við Rauða húsið á Eyrarbakka, en hann var þar ölvaður og vann skemmdir á bifreið eftir að hafa átt í útistöðum við fólk.

Þá var allt með rólegra móti í bæjum á Vesturlandi í nótt, að sögn lögreglu. Enginn þurfti að gista fangageymslur hjá lögreglu á Akranesi, í Borgarnesi eða á Snæfellsnesi.

Meira var um að vera í umdæmi lögreglunnar á Ísafirði, en böll voru haldin bæði á Ísafirði og í Bolungarvík í gærkvöldi og nótt. Að sögn varðstjóra þar fór skemmtanahaldið þó vel fram að mestu, eitt tilfelli kom upp þar sem ballgestir fóru að slást en enginn var handtekinn vegna þess máls. Þá var einn ökumaður tekinn vegna ölvunar við akstur.

Sömu sögu er að segja fyrir norðan, á Sauðárkróki, Akureyri og Húsavík. Þar var skemmtanahald rólegt, enginn þurfti að gista fangageymslur og enginn var tekinn fyrir ölvunarakstur í þeim lögregluumdæmum. Eins og varðstjóri hjá lögreglunni á Akureyri orðaði það var eitthvað um samskiptavandamál milli fólks á skemmtistöðum, en án stórvægilegra eftirmála.