„ÞAÐ ÁKVÆÐI sem gefur heimild til að breyta stjórnarskránni með þjóðaratkvæðagreiðslu, með samþykki þings, er sú opnun sem við þurfum á að halda,“ segir Árni Páll Árnason, þingmaður Samfylkingarinnar og formaður allsherjarnefndar Alþingis, um vöntun á ákvæði í frumvarp til stjórnskipunarlaga um breytingu á stjórnarskránni til að hægt sé að hefja viðræður um aðild að Evrópusambandinu, þ.e. heimild til að framselja ríkisvaldið.

Árni Páll segir að ef frumvarpið nái fram að ganga verði hægt að gera breytingu á stjórnarskránni, þ.e. heimila framsalið, og leggja breytingartillöguna fyrir þjóðina um leið og þjóðin greiðir atkvæði um aðildarsamninginn. Því telji Samfylkingin að um fullnægjandi stjórnskipulagsbreytingu sé að ræða.

„Það er ekkert sem bannar okkur að leggja af stað í aðildarviðræður að óbreyttri stjórnarskrá. En hins vegar mun aðildin ekki taka gildi fyrr en stjórnskipulegum fyrirvörum er aflétt,“ segir Árni Páll og bætir við að því sé mjög mikilvægt að frumvarpið fari í gegn, þ.e. til að heimila þetta verklag.