Rekja má tafir í tölvukerfum menntasviðs Reykjavíkurborgar til tveggja bilana sem urðu á svipuðum tíma á föstudag. Samkvæmt upplýsingum Sigþórs Arnar Guðmundssonar, forstöðumanns upplýsingatækniþjónustu menntasviðs borgarinnar, varð bilun í tölvupóstkerfi í kjölfar rafmagnsleysis á föstudag. Við hana duttu öll pósthús menntasviðs út og þar með tölvupóstssamband 130 grunn- og leikskóla í borginni.

Kerfið lá alveg niðri í tvo tíma fyrir hádegi á föstudag en síðan þá hefur verið unnið að því að koma tölvupóstþjónustunni aftur í gang. Þjónustan er á 42 pósthúsum og hafa þau verið tengd eitt af öðru. Enn eru fimm pósthús ótengd en gert er ráð fyrir að hægt verði að tengja þau í dag. Allir leikskólar borgarinnar eru á einu pósthúsi en hver grunnskóli á sínu eigin pósthúsi.

Samkvæmt upplýsingum Sigþórs varð einnig önnur ótengd bilun í netkerfi Reykjavíkurborgar á föstudag. Má rekja seinagang í annarri netþjónustu skólanna og menntasviðs til þeirrar bilunar. Þá hefur sú bilun tafið vinnu við að koma póstkerfinu aftur í gang.

Vonast er til að bæði kerfin verði farin að starfa með eðlilegum hætti í lok dagsins í dag.