Reuters

Eftir Sigtrygg Sigtryggsson sisi@mbl.is

Nærri þrír af hverjum fjórum Íslendingum eru hlynntir því að taka upp aðildarviðræður við Evrópusambandið. Stuðningurinn við viðræður hefur ekki verið meiri í sex ár. Á hinn bóginn eru þeir nú fleiri sem segjast andvígir aðild en þeir sem segjast hlynntir aðild að ESB. Þetta er niðurstaða könnunar sem Capacent Gallup hefur gert fyrir Samtök iðnaðarins.

Guðbjörg Andrea Jónsdóttir, rannsóknarstjóri Capacent, segir að í þessari afstöðu sé ekki endilega þversögn.

„Ég held að margir Íslendingar séu ekki sérstaklega spenntir fyrir því að ganga í Evrópusambandið en vilja greinilega láta reyna á það hvað verður í boði,“ segir Guðbjörg.

Hún telur að efnahagsástandið á Íslandi og þrengingar fólks hafi aukið áhuga á því að láta reyna á viðræður við ESB. „Fólk vill láta reyna á það hvað við getum komist langt.“

Guðbjörg segir að það ýti undir þessa skoðun að í könnuninni voru mun fleiri þeirrar skoðunar að aðild að ESB mundi hafa jákvæð áhrif á eigin lífskjör og einnig á efnahag þjóðarinnar í heild.

Stuðningur við aðildarviðræður hefur vaxið umtalsvert frá síðustu sambærilegu könnun í ágúst 2008. Rúm 64% aðspurðra í könnuninni kváðust hlynnt aðildarviðræðum að ESB en 28% eru þeim andvíg og tæp 8% eru hvorki hlynnt þeim né andvíg.

Nánar er fjallað um málið í Morgunblaðinu í dag.