Tölvuteikninga af Tónlistarhúsinu mbl.is

Eftir Þórð Snæ Júlíusson thordur@mbl.is

Fjárlaganefnd hefur óskað eftir því að Ríkisendurskoðun framkvæmi sérstaka skoðun á framtíðaráformum um tónlistar- og ráðstefnuhús við Reykjavíkurhöfn. Stofnunin á síðan að skila af sér greinargerð um málið þar sem lagt verður mat á framtíðaráform um tónlistarhús í ljósi yfirlýsingar Katrínar Jakobsdóttur menntamálaráðherra og Hönnu Birnu Kristjánsdóttur borgarstjóra í Reykjavík frá 19. febrúar síðastliðnum, en í yfirlýsingunni tilkynntu þær að haldið yrði áfram með byggingu hússins.

Fjárlaganefndin vill að fram komi í greinargerð Ríkisendurskoðunar hvort það sé heimilt samkvæmt fjárreiðulögum að taka veð í væntanlegum fjárframlögum ríkisins og leigugreiðslum Sinfóníuhljómsveitar Íslands líkt og stefnt er á að gera. Auk þess vill nefndin að Ríkisendurskoðun leggi mat á annars vegar fjárfestingu og fjármögnun verksins á byggingartíma þess og hins vegar á rekstrar- og greiðsluáætlanir á fyrstu starfsárum tónlistarhússins.

Fulltrúar Austurhafnar og fulltrúar fjármála- og menntamálaráðuneytisins komu fyrir fjárlaganefnd í gær til þess að gera grein fyrir framtíðaráformum um tónlistarhúsið. Nefndin óskaði í framhaldi eftir greinargerð frá bæði menntamálaráðuneytinu og Austurhöfn um framtíðaráform um húsið og eftir mati ráðuneytisins um hvort samkomulagið frá því í febrúar væri í samræmi við lög um fjárreiður ríkisins. Greinargerð ráðuneytisins á að kynna á fundi fjárlaganefndar hinn 23. mars nk.

Gunnar Svavarsson, formaður fjárlaganefndar, segir að einhugur hafi verið í nefndinni að fylgja málinu eftir með þessum hætti. ,,Nefndin er ekki að gera sér upp niðurstöðu fyrirfram heldur er hún einungis að afla sér gagna til að geta metið framgang og fjárhagsskuldbindandi ákvarðanir, sem eiga að vera í samræmi við fjárreiðulög,“ segir hann.