Sólarlag við Hornafjörð eftir Ásgrím Jónsson. Mynd fengin af vef Gallerís Foldar.

Eftir Jón Pétur Jónsson

Gallerí Fold stóð fyrir listmunauppboði í gær sem var vel sótt. Fjölmörg verk voru í boði m.a. eftir gamla meistara á borð við Jóhannes S. Kjarval, Ásgrím Jónsson og Nínu Tryggvadóttur. Að sögn Tryggva Páls Friðrikssonar, listmunasala og uppboðshaldara, var slegist um verk eftir Kjarval og Ásgrím.

Tryggvi Páll segir að dýrasta verkið að þessu hafi verið málverkið „Sólarlag við Hornafjörð“ eftir Ásgrím Jónsson. Það var barist um verkið, sem er frá 1911, en það var loks slegið hæstbjóðanda á 3,2 milljónir kr. Það var metið á 2,8 til 3 milljónir. 

„Síðan var harður slagur um Kjarval,“ segir Tryggvi Páll um verkið „Víkingarnir“, en það fór á 1.250 þúsund. Það er vel yfir verðmati, en verkið var metið á 600 til 800 þúsund kr.

Annað verk eftir Ásgrím „Arnarfell“ var slegið á tvær milljónir kr. Það var hins vegar metið á 2,8 til 3 milljónir.

„Það var troðfullt hús,“ segir Tryggvi Páll, en húsið tekur um 200 manns. Hann tekur hins vegar fram að aðeins hluti gestanna hafi boðið í verkin. Meirihluti kaupenda eru Íslendingar en að sögn Tryggva er ávallt eitthvað um útlendinga. Þá segir hann að um þriðjungur sölunnar hafi farið fram í gegnum síma.

„Þetta fór allt á viðunandi verði, verð ég að segja,“ segir Tryggvi Páll aðspurður um sölutölurnar, en mörg verk voru seld undir verðmati. Þrátt fyrir það sé ljóst að enn eigi einhverjir krónur í bauknum til listmunakaupa.

Alls voru 94 verk í boði og að sögn Tryggva Páls seldust um 85 þeirra. 

Vefur Gallerí Foldar.

Víkingarnir eftir Jóhannes Kjarval. Mynd fengin af vef Gallerís Foldar.