Hanna Birna Kristjánsdóttir Rax / Ragnar Axelsson

Tillaga að endurskoðun fjárhagsáætlunar fyrir árið 2009 var lögð fram í borgarráði í dag. Endurskoðun fjárhagsáætlunar fyrir árið 2009 hófst strax í byrjun janúar með það að markmiði að  mæta 2,3 milljarða króna hagræðingarkröfu. Samkvæmt upplýsingum frá borgarstjóra, Hönnu Birnu Kristjánsdóttur, hefur það tekist.

Á þriðja þúsund starfsmanna hjá Reykjavíkurborg tóku þátt í vinnu við endurskoðun fjárhagsáætlunar. Fram hafa komið um 1.500 hugmyndir frá starfsfólki um hagræðingu í rekstri borgarinnar. Af þessum hugmyndum urðu til 300 umbótaverkefni, sem eru þegar komin í farveg. Stór hluti þeirra er þegar kominn með fjárhagsleg markmið sem birtast í tillögu að endurskoðun fjárhagsáætlunar, að því er segir í tilkynningu.

Ljóst er að sett markmið við endurskoðun fjárhagsáætlunar hefur náðst, þ.e. að hagræða um rúma 2,3 milljarða króna í samræmi við samþykkta fjárhagsáætlun og sameiginlegan vilja borgarstjórnar um að standa vörð um grunnþjónustu Reykjavíkurborgar, störf starfsmanna og gjaldskrár í samræmi við aðgerðaráætlun borgarstjórnar frá 7. október sl.

Hanna Birna Kristjánsdóttir borgarstjóri fagnar því í fréttatilkynningu að takmarkinu sé náð. ,,Fyrir tilstuðlan frábærs starfsfólks Reykjavíkurborgar hafa markmið um að standa vörð um grunnþjónustu borgarinnar, störf starfsfólks og gjaldskrár náðst. Það er nýmæli í íslenskri stjórnsýslu að svo margt starfsfólk komi að vinnu við endurskoðun fjárhagsáætlunar og fái tækifæri til að leggja sitt af mörkum við að gera borgarreksturinn sem hagkvæmastan. Þetta minnir okkur á að það er allt hægt þegar allir leggjast á eitt.“

Margar þeirra tillagna sem komu fram hjá starfsfólki munu bæta rekstur borgarinnar til lengri tíma litið, m.a. með nýjum umhverfisvænum lausnum. Meðal þeirra tillagna sem koma fram við endurskoðunina er að hagrætt verður í almennum rekstri allra starfsstaða, hefðbundnum skrifstofurekstri og fundakostnaði, innkaupum á vöru og þjónustu.

Rafræn stjórnsýsla verður aukin og dregið úr kostnaði vegna áhalda og tækjakaupa og sparað í innkaupum hugbúnaðarleyfa. Leitað verður leiða til að minnka húsaleigukostnað og orkunotkun, kostnað við aðkeypta þjónustu og endursemja við birgja vegna innkaupa. Dregið verður úr kostnaði vegna sérfræðiþjónustu, bifreiða, ferða, bensín- og olíukaupa, auglýsinga og farsíma með endurskoðun á heimildarmörkum. Ennfremur verður dregið úr kostnaði við móttökur, rekstur og viðhald gatna og opinna svæða svo eitthvað sé nefnt, að því er segir í tilkynningu.