Kristín Ingólfsdóttir. Árvakur/Ómar

Kristín Ingólfsdóttir, rektor Háskóla Íslands heimsótti í vikunni Harvard háskóla í Boston í Bandaríkjunum.  Kristínu var boðið að flytja erindi í Menntavísindaskóla Harvard (Harvard Graduate School of Education) þar sem hún ræddi um hlutverk og ábyrgð háskóla á tímum endurreisnar  efnahagslífs.  

Kristín átti jafnframt fundi í Harvard School of Public Health en víðtækt samstarf hefur verið milli hans og Háskóla Íslands í rannsóknum og kennslu í lýðheilsuvísindum, samkvæmt tilkynningu frá HÍ.  

Þá heimsótti Kristín Broad Institute og hitti Eric Lander sem veitir stofnuninni forstöðu, en hann var nýlega skipaður ráðgjafi í stjórn Baracks Obama í málefnum vísinda.

 „Efnahagsáföll í Bandaríkjunum að undanförnu hafa valdið fjárhagserfiðleikum hjá Harvard háskóla.  Forsvarsmenn skólans sýndu mikinn áhuga á að heyra um viðbrögð Íslendinga eftir efnahagshrun,  með hvaða hætti brugðist hafi verið við og hvaða tækifæri Íslendingar sjái í erfiðri stöðu.  Samstarf Háskóla Íslands og Harvard hefur verið mjög farsælt, og í ljósi þess lýstu forsvarsmenn Harvard áhuga á auknu samstarfi. Ýmsir möguleikar verða því skoðaðir í kjölfar heimsóknarinnar. 

Kristín lagði í erindi sínu áherslu á mikilvægi stefnufestu og þess að byggja á styrkleikum í endurreisn efnahagskreppu auk þess að vinna markvisst að aukinni verðmætasköpun, m.a. innan háskóla.  Sterk staða íslenska heilbrigðis- og menntakerfis, sem og sjávarafurðir, endurnýjanleg orka og aðrar auðlindir yrðu Íslendingum  traustar stoðir í endurreisn," að því er segir í tilkynningu frá HÍ.