„Eftir mun þá standa fortakslaust bann við því að bjóða upp á nektarsýningar eða að gera með öðrum hætti út á nekt starfsmanna eða annarra sem á staðnum eru.“ Þetta segir í greinargerð með frumvarpi sem sex þingmenn Framsóknarflokks, Vinstri grænna og Samfylkingarinnar standa að en þessir flokkar mynda meirihluta á Alþingi. Þar er lagt til að felld verði brott undanþáguheimild til nektarsýninga í atvinnuskyni á veitingastöðum.

Siv Friðleifsdóttir, Framsóknarflokki, er fyrsti flutningsmaður frumvarpsins og mælti hún fyrir því á þingfundi í gær. Var því við svo búið vísað til nefndar.

Benda flutningsmenn á að óvissa sé um túlkun undanþáguákvæðis þar sem unnt er að heimila nektardans í rekstrarleyfi veitingastaðar ef jákvæðar umsagnir fást frá umsagnaraðilum. Taka beri af tvímæli um þetta og banna nektardans með öllu eins og borgarráð hafi hvatt til. Siv sagði að allsherjarnefnd ætti að geta afgreitt málið á stuttum tíma.