mbl.is/Árni Sæberg

Drög að samkomulagi sem liggja fyrir um kaup Austurhafnar á félögunum Portus og Situs í tengslum við áframhald framkvæmda við Tónlistarhúsið brjóta ekki gegn ákvæðum laga um fjárreiður ríkisins að mati menntamála- fjármálaráðuneyta.

Katrín Jakobsdóttir, menntamálaráðherra og Hanna Birna Kristjánsdóttir borgarstjóri, undirrituðu þann 19. febrúar viljayfirlýsingu um áframhald framkvæmda við Tónlistarhús og ráðstefnumiðstöð við Austurhöfnina í Reykjavík. Samkvæmt samkomulaginu mun Austurhöfn-TR ehf., félag í eigu ríkis og borgar, taka yfir félögin Portus og Situs og þar með byggingu tónlistarhússins. Kaupverð félaganna, krafna á félögin, byggingarréttar og lóða verður lánað til sjö ára og greiðast hvorki afborganir né vextir á þeim tíma. Allar áætlanir miðast við að ekki þurfi að koma til aukin framlög ríkis og borgar frá því sem ákveðið var á árinu 2004 þegar framkvæmdir og rekstur tónlistarhúss og ráðstefnumiðstöðvar voru boðin út. Þess í stað munu innlendar lánastofnanir lána fé til kaupanna og framkvæmda við tónlistarhúsið gegn veði í eignum félaganna og samningsbundnu framlagi ríkis og borgar til Portusar.

Fulltrúar Ríkisendurskoðunar, fjármálaráðuneytis, menntamálaráðuneytis og Austurhafnar - TR ehf. komu á fund fjárlaganefndar í morgun til að fjalla um fjárskuldbindingar ríkisins í tengslum við byggingu tónlistarhúss og ráðstefnumiðstöðvar við Austurhöfn í Reykjavík.

Í minnisblaði Ríkisendurskoðunar kemur fram að með vísan til ákvæða fjárreiðulaga og annarra tilgreindra laga búi fullnægjandi lagaheimildir að baki skuldbindingum þeim sem ríkið gekkst undir með samningnum (Project Agreement) við Portus ehf. á sínum tíma.

Jafnframt telur Ríkisendurskoðun að veðsetning sú sem til umfjöllunar hefur verið feli ekki í sér viðbótarskuldbindingar fyrir ríkissjóð samkvæmt fyrirliggjandi samningum varðandi TR. Það er því mat Ríkisendurskoðunar, með vísan til þess sem fram kemur í minnisblaði stofnunarinnar, að framangreind veðsetning sé ekki í andstöðu við fjárreiðulögin.