Héraðsdómur Reykjaness hefur dæmt karlmann á þrítugsaldri í fimm mánaða fangelsi fyrir líkamsárás. Honum er að auki gert að greiða fórnarlambi sínu 337 þúsund krónur í miskabætur. Þetta var fjórða líkamsárás mannsins á tæpum tveimur árum.

Mennirnir tveir unnu saman við malbikun síðastliðið sumar. Raunar hafði fórnarlambið aðeins unnið einn dag þegar árásin átti sér stað. Mennirnir voru að moka malbiki þegar árásarmaðurinn öskraði að hinum „skóflaðu fávitinn þinn“. Maðurinn svaraði fyrir sig og veittist árásarmaðurinn þá að honum og skallaði í andlitið. Hann játaði brot sitt en sagði fórnarlambið áður hafa barið frá sér og við það hafi hann reiðst. Sá framburður fékk ekki stoð í vætti vitna. Árásarmaðurinn sagði í skýrslutöku hjá lögreglu að hann ætti til að missa stjórn á skapi sínu. Skapgerð hans mætti rekja til höfuðáverka sem hann hlaut þegar hann var unglingur.

Í niðurstöðu dómsins segir að þar sem sá sakfelldi hafi áður gerst sekur um líkamsárásarbrot þykir ekki tilefni til að skilorðsbinda refsingu hans.