Ríkisendurskoðun telur að með vísan til lagaákvæða fjárreiðulaga og annarra tilgreindra laga búi fullnægjandi lagaheimildir að baki skuldbindingum þeim sem ríkið gekkst undir með samningnum við Portus ehf. vegna framkvæmda við Tónlistarhúsið í Reykjavík.

Fulltrúar Ríkisendurskoðunar, fjármálaráðuneytis, menntamálaráðuneytis og Austurhafnar - TR ehf. fóru á fund fjárlaganefndar í gær þar sem fjallað var um fjárskuldbindingar ríkisins í tengslum við byggingu tónlistarhúss og ráðstefnumiðstöðvar við Austurhöfn.

Í minnisblaði Sveins Arasonar ríkisendurskoðanda til fjárlaganefndar Alþingis er vísað til samnings Austurhafnar og Portusar ehf. frá 9. mars 2006 sem kvað á um að eigendur Austurhafnar, þ.e. ríkið og borgin, skyldu greiða mánaðarlegt framlag til verkefnisins á samningstímanum, sem er 35 ár. Framlag ríkisins skyldi vera 54% en borgar 46%. Tekið er sérstaklega fram að þar sem Ríkisendurskoðun hafi gefist stuttur tími til að velta því álitamáli fyrir sér hvort áform um breytingar á samningnum, eftir bankahrunið, feli í raun í sér viðbótarskuldbindingar fyrir ríkissjóð, treysti hún sér ekki til að gefa afdráttarlaust álit.

Hins vegar sé ríkissjóður skilyrðislaust skuldbundinn samkvæmt almennum reglum samninga- og kröfuréttar til þess að standa að fullu við skuldbindingar sínar að því gefnu að gagnaðilar samningsins vanefni hann ekki af sinni hálfu. Til að eyða öllum vafa um hvaða áhrif breytingar á samningum hafi á fjármögnun ríkisins sé „skynsamlegt að Alþingi staðfesti breytingarnar fyrir sitt leyti t.d. í fjáraukalögum fyrir árið 2009 eða komandi fyrir árið 2010“.

Gunnar Svavarsson, formaður fjárlaganefndar, segir spurður um málið skipta meginmáli að viðskiptabankarnir þrír sem komi með lánsfé inn í framkvæmdina séu fullvissir um að heimildir séu til staðar.