Sjávarútvegsráðherra fær heimild til að leyfa takmarkaðar veiðar í fræðsluskyni, samkvæmt frumvarpi sem sjávarútvegs- og landbúnaðarnefnd lagði fram á Alþingi í dag. Þá verða settar ítarlegar reglur um frístundaveiðar sem fara fram á vegum ferðaþjónustuaðila.

Frístundaveiðar við Ísland er nýr vaxandi þáttur í ferðaþjónustu hér við land en veiðar á frístundafiskibátum eins og þekkjast í dag hófust að marki á Vestfjörðum árið 2006. Þessar veiðar hafa bæði verið stundaðar á venjulegum fiskibátum sem í annan tíma stunda veiðar í atvinnuskyni og sérstökum frístundabátum sem hafa verið smíðaðir sérstaklega í þessum tilgangi.

Í samstarfi samgönguráðuneytisins og sjávarútvegsráðuneytisins og stofnana ráðuneytanna varð til skilgreining á fiskibátum til þessara nota og eru þeir skráðir sem slíkir. Frístundafiskibátur er að jafnaði minni og meðfærilegri en almennir handfærabátar og allur búnaður bátsins við það miðaður að þeir sem nota bátinn séu aðilar sem hafa ekki langa viðdvöl um borð í bátnum. Ekki var þó í neinu slakað á öryggiskröfum við smíðina enda bátarnir smíðaðir samkvæmt þeim kröfum og reglum sem almennt gilda um smíði íslenskra fiskiskipa.

Heildarveiði þessara báta var um 200 tonn árið 2007 og var þorskafli þar af um 180 tonn. Árið 2008 var heildaraflinn um 250 tonn og var þorskafli þar af um 220 tonn. Fjöldi skráðra frístundabáta er nú 43 en ekki liggja fyrir nákvæmar tölur um fjölda annarra báta sem selja ferðir í sjóstangaveiði.

Samkvæmt frumvarpi sjávarútvegs- og landbúnaðarnefndar verður heimilt, án sérstaks leyfis, að stunda fiskveiðar í frístundum til eigin neyslu. Slíkar veiðar má stunda með sjóstöng og handfærum án sjálfvirknibúnaðar en samkvæmt gildandi lögum er einungis heimilt að stunda veiðarnar með handfærum. Afla sem veiddur er samkvæmt þessu ákvæði er einungis heimilt að hafa til eigin neyslu og er óheimilt að selja eða fénýta hann á annan hátt. Þá verður sjávarútvegsráðherra heimilt að ákveða árlega að á tilteknum fjölda opinberra sjóstangaveiðimóta teljist afli ekki til aflamarks eða krókaaflamarks, enda sé aflinn einungis fénýttur til að standa straum af kostnaði við mótshaldið.

Frumvarpið í heild