Jafnréttisstofa hyggst taka fyrir kvörtun Silju Báru Ómarsdóttur, aðjúnkts í stjórnmálafræði við HÍ, þess efnis að lögmæti skipunar bankaráðs Seðlabankans verði kannað. Í erindi sem Silja Bára hefur sent bæði Jafnréttisstofu og Guðbjarti Hannessyni, forseta Alþingis, þar sem bankaráðið er kosið af Alþingi samkvæmt lögum, bendir hún á að alls sitji fimm karlar og aðeins tvær konur sem aðalmenn í nýskipuðu seðlabankaráði.

Samkvæmt 15. grein laga um jafna stöðu og jafnan rétt kvenna og karla frá 6. mars 2008 er kveðið á um það að þess skuli gætt við skipun í ráð á vegum ríkisins að hvort kyn skipi að minnsta kosti 40% sæta þegar um fleiri en þrjá fulltrúa er að ræða. Í samtali við Morgunblaðið segir Kristín Ástgeirsdóttir, framkvæmdastýra Jafnréttisstofu, spurningu hvort hægt sé að kæra löggjafarvaldið fyrir brot á lögum.

„Það hefur því miður kosist í nefndir á Alþingi þannig að kynjahlutföllin hafa verið hörmuleg. Það er ekkert annað hægt en að skammast sín fyrir það,“ sagði Steingrímur J. Sigfússon. Tók hann fram að nýskipað seðlabankaráð væri eingöngu kosið til örfárra vikna, en kosið yrði í það að nýju eftir komandi kosningar. „Við skulum vona að menn standi sig bara betur næst.“