Fjármálaráðherrar Íslands og Færeyja skrifuðu í dag undir lánssamning milli Landsstjórnar Færeyja og íslenska ríkisins. Samkvæmt samningnum lánar Landsstjórn Færeyja íslenska ríkinu 300 milljónir danskra króna, jafnvirði 6,2 milljarða króna á núverandi gengi.

Lánið frá Færeyjum er veitt til langs tíma og á hagstæðum kjörum. Það er viðbót við lán Alþjóðagjaldeyrissjóðsins, sem nemur 2100 milljónum Bandaríkjadala, og er veitt til stuðnings við efnahagsáætlun íslenskra stjórnvalda í samstarfi við sjóðinn. Lánunum er ætlað að efla gjaldeyrisvarasjóð Íslands í þeim tilgangi að koma á jafnvægi í íslenskum efnahagsmálum.

Þetta er fyrsta tvíhliða lánið til Íslands af þessu tagi, en Danmörk, Finnland, Noregur og Svíþjóð, hafa sameiginlega gefið fyrirheit um að veita Íslandi gjaldeyrislán sem nemur 2500 milljónum Bandaríkjadala.

Viðræður um gerð lánasamninga við þessi fjögur Norðurlönd standa nú yfir og segir fjármálaráðuneytið, að þess sé að vænta að þeim verði lokið á næstu vikum. Þá séu í gangi viðræður við fulltrúa Póllands og Rússlands um gjaldeyrislán til Íslands sem þau hafa gefið fyrirheit um.

Steingrímur J. Sigfússon, fjármálaráðherra og Joannes Eidesgaard, fjármálaráðherra Landsstjórnar Færeyja, skrifuðu undir lánasamninginn í Þórshöfn í kvöld. Með Seingrími voru í för Svein Harald Øygard, seðlabankastjóri, Jón Sigurðsson, formaður viðræðunefndar íslenska ríkisins um gjaldeyrislánasamninga og Sturla Pálsson, framkvæmdastjóri alþjóða- og markaðssviðs Seðlabanka Íslands.