mbl.is/Golli

eftir Bergþóru Njálu Guðmundsdóttur ben@mbl.is

Leiguhlíð, fasteignafélag Frjálsa fjárfestingarbankans (FF), kaupir eignir sem bankinn hefur leyst til sín á uppboði, á því verði sem krafa bankans stendur í eða á markaðsverði sé það lægra, að sögn Kristins Bjarnasonar framkvæmdastjóra.

Þegar banki eignast fasteign á uppboði, sem hann á veð í, gengur andvirði eignarinnar upp í kröfu bankans á húseigandann. Yfirleitt er uppboðsverðið töluvert undir markaðsvirði sem oft á tíðum þýðir að það gangi aðeins upp í hluta kröfunnar. Selji bankinn eignina þriðja aðila á hærra verði en uppboðsverðið var á milligjöfin einnig að ganga upp í kröfuna. Þannig er tryggt að skuld húseigandans við bankann lágmarkist.

Eftir að Morgunblaðið greindi frá því að FF selji húseignir sem bankinn hefur leyst til sín á uppboðum, til leigufélagsins Leiguhlíðar sem einnig er í eigu bankans, hafa menn viðrað áhyggjur af því að það sé gert á lægra verði en eignirnar hefðu annars farið á. Þannig gæti lántakandinn setið eftir með hærri skuld en ella. Kristinn vísar þessu á bug. „Eignin fer annaðhvort á því verði sem krafa bankans stendur í eða á markaðsverði ef það er lægra,“ segir hann. „Þetta er hugsað eins og ef við værum að selja þriðja aðila. Viðskiptavinurinn fer eins vel út úr þessu og mögulegt er.“

Aðspurður segir hann bankann meta markaðsverðið en lántakandinn geti gert athugasemdir við það mat. „Viðkomandi á alltaf rétt á að koma með verðmat annars staðar frá og ef það væri ágreiningur fengjum við óháðan aðila til að verðmeta eignina. Í flestum tilfellum dugar þó eignaverðið því við erum yfirleitt með lán á fyrsta veðrétt.“