Verkalýðsfélag Vestfirðinga vonar að fleiri fyrirtæki fylgi fordæmi HB Granda, Brims og fleiri fyrirtækja og greiði áður umsamdar launahækkanir. Félagið skorar á atvinnurekendur að láta frestaðar launahækkanir koma til framkvæmda og sýna þannig í verki hversu mikils virði framlag starfsmanna er í rekstri fyrirtækjanna.

Eins og fram hefur komið hafa HB Grandi, Brim, Hrognavinnsla Vignir G. Jónssonar á Akureyri og fleiri ákveðið að greiða umsamdar launahækkanir, þrátt fyrir samkomulag samninganefnda ASÍ og SA um frestun kjarasamninga fram á sumar. Hækkanirnar gilda frá 1. mars eins og um hafði verið samið.

„Með þessum hækkunum var stigið mikilvægt skref í rétta átt að bættum kjörum taxtalaunafólks hjá fyrirtækinu. Það er von okkar sem að þessum málum koma að önnur fyrirtæki sem standa vel fylgi í kjölfarið og greiði áður frestaðar launahækkanir frá 1.mars,“ segir á vef Verkalýðsfélags Vestfirðinga.

Þá kemur fram að stjórn félagsins sendi þann 5. mars sl. frá sér hvatningu til eigenda og stjórnenda fyrirtækja að þau sem betur stæðu ættu að sjá sóma sinn í því að greiða út umsamdar taxtahækkanir og tryggja að enginn taxti væri undir grunnatvinnuleysisbótum. Lágmarkstekjutrygging fyrir fullt starf er nú 157.000 krónur á mánuði og þeir sem eru hlutaráðnir eiga hlutfallslegan rétt til þess sama.

Verkalýðsfélag Vestfirðinga segir að á Vestfjörðum séu nokkur stór og öflug fyrirtæki sem ættu að hafa góða burði til að standa við taxtahækkanir til starfsmanna sinna.

„Það ætti að vera keppikefli fyrir þessi fyrirtæki að láta starfsfólkið njóta meiri ávinnings af þeim verðmætum sem það hefur í gegnum tíðina skapað fyrirtækjunum með vinnuframlagi sínu. Í ljósi þessa skorar Verkalýðsfélag Vestfirðinga á atvinnurekendur að láta frestaðar launahækkanir koma til framkvæmda og sýna þannig í verki hversu mikils virði framlag starfsmanna er í rekstri fyrirtækjanna.“

Vefur Verkalýðsfélags Vestfirðinga