mbl.is/Árni Sæberg

Eftir Björn Jóhann Björnsson bjb@mbl.is

Enn er eftir að ganga frá fjármögnun áframhaldandi framkvæmda við ráðstefnu- og tónlistarhúsið. Rúmur mánuður er síðan menntamálaráðherra og borgarstjóri rituðu undir viljayfirlýsingu um að hefja skyldi framkvæmdir á ný, með því að Austurhöfn-TR ehf. yfirtæki verkið en félagið er að 54% hluta í eigu ríkisins og 46% í eigu Reykjavíkurborgar. Þá kom fram að fjármögnun væri á lokastigi en Nýi Landsbankinn ætlaði að fara fyrir íslensku sambankaláni, með þátttöku Nýja Kaupþings og Íslandsbanka. Talið er að kostnaður við að ljúka verkinu á næstu tveimur árum sé um 15 milljarðar króna.

Samkvæmt upplýsingum frá Nýja Landsbankanum er málið enn til meðferðar í bönkunum en niðurstöðu að vænta á allra næstu dögum.

Fljótlega eftir að skrifað var undir viljayfirlýsinguna hófu Íslenskir aðalverktakar, ÍAV, framkvæmdir að nýju en þær höfðu legið niðri síðan fyrir jól. Var farið af stað í þeirri trú að fjármagnið væri á leiðinni en ÍAV hefur síðan þá framkvæmt fyrir eigin reikning. Um 150 manns starfa nú við byggingu tónlistarhússins.

Fjárlaganefnd Alþingis gerði á dögunum ákveðnar athugasemdir við aðkomu ríkisins að verkinu og óskaði eftir álitsgerð Ríkisendurskoðunar. Niðurstaða hennar var sú að ríkið tæki ekki á sig skuldbindingar umfram þær sem fyrir lágu í samningum um tónlistarhúsið frá 2006 og ekki þyrfti að leita samþykkis Alþingis fyrir breyttum ráðstöfunum.

„Þetta er farið að bitna mjög á framkvæmdinni og bagalegt að fjármögnunin skuli ekki hafa klárast. Við höfum þurft að halda aftur af okkur og ekki sett allt á fullt,“ segir Sigurður R. Ragnarsson, verkefnastjóri ÍAV við tónlistarhúsið, og telur að ef fjármögnuninni verði ekki lokið um mánaðamótin þurfi ÍAV að fækka starfsmönnum við verkið á ný.