Þorkell Þorkelsson

Sérgreinalæknar utan sjúkrahúsa hafa fallist á að 9,8% hækkun á einingaverði fyrir unnin læknisverk, sem átti að koma til framkvæmda 1. apríl, verði frestað og viðræður teknar upp við heilbrigðisráðuneytuð um mögulega endurskoðun á kjörum læknanna.

Þetta kom fram á blaðamannafundi Ögmundar Jónassonar, heilbrigðisráðherra í dag. Hann skýrði einnig frá því, að læknar á Vestfjörðum hefðu samþykkt að taka á sig launalækkun með því að vinna bakvaktir án greiðslna. Með þeirri aðgerð næst fram 12 milljóna króna sparnaður.

Á blaðamannafundinum kynnti Ögmundur aðgerðir, sem sjúkrastofnanir á Suðurnesjum, Selfossi og Hafnarfirði ætla að grípa til með það að markmiði að rekstur þessara stofnana verði innan ramma gildandi fjárlaga en að óbreyttu stefndi í umtalsverðan halla á rekstrinum.

Þessar aðgerðir felast að mestu leyti í samstarfi stofnananna sín á milli og við Landspítalann. Það mun leiða til sparnaðar í launakostnaði vegna minni yfirvinnu og vaktaálags. Einnig verður verktakagreiðslum til lækna sagt upp.

Á fjárlögum fyrir árið 2009 er gert ráð fyrir 6,7 milljarða niðurskurði í útgjöldum til heilbrigðismála miðað við síðasta ár. Þar af er Landspítalanum gert að spara 2,7 milljarða króna. Ögmundur sagði, að með breytingum á lyfjakostnaði næðist fram 1,3 milljarða króna hagræðing. Þá verða framlög til öldrunarþjónustu skorin niður um 1,4 milljarða og Heilsugæslunni á höfuðborgarsvæðinu er gert að spara 240 milljónir á þessu ári.

Fram kom í máli stjórnenda St. Jósefsspítala/Sólvangs, Heilbrigðisttofnunar Suðurnesja og Heilbrigðisstofnunar Suðurlands á fundinum, að á hverri stofnun fyrir sig nemi niðurskurðurinn 100-150 milljónum króna á ársgrundvelli. Um er að ræða 9,5% af fjárlögum ársins í Hafnarfirði,  5,2% á Suðurnesjum og 5,6% á Suðurlandi.

Ögmundur benti á það á fundinum í dag, að 75-80% af útgjöldum til heilbrigðismála sé launakostnaður og aðeins með því að lækka þann útgjaldalið um 5% myndi nást fram 4 milljarða króna sparnaður.