Um 15 milljónir króna söfnuðust í sameiginlegri landssöfnun Rauða kross Íslands og Hjálparstarfs kirkjunnar sem fram fór undir einkunnarorðunum Stöndum saman – gefum hundrað kall á haus  í síðustu viku.

Skorað var á alla landsmenn að gefa sem svarar eitt hundrað krónum á hvert mannsbarn í landinu. Heildarupphæðin jafngildir því að um helmingur þjóðarinnar hafi hlýtt kalli Rauða krossins og Hjálparstarfs kirkjunnar.

Söfnunarfénu verður varið til matvælaaðstoðar á vegum Hjálparstarfs kirkjunnar um allt land og Rauði krossinn mun veita sálrænan stuðning og hjálpa fólki við að halda sér virku í samfélaginu þrátt fyrir áföll sem einstaklingar og fjölskyldur verða fyrir í kjölfar efnahagshrunsins.

Um símasöfnun var að ræða þar sem 100 krónur drógust frá á næsta símreikningi við innhringingu gefanda. Með því að hafa upphæðina svo lága var áhersla lögð á að allir gætu lagt sitt að mörkum burtséð frá afkomu og aðstæðum hvers og eins.

Öll símafyrirtæki í landinu, Síminn, Tal, Vodafone og Nova, sýndu samstöðu sína með Rauða krossinum og Hjálparstarfi kirkjunnar með því að gefa eftir allan kostnað og þjónustugjöld við símasöfnunina. Þá veittu SPRON, Kaupþing, Íslandsbanki og Landsbanki styrki til að mæta kostnaði við birtingu auglýsinga.

Enn er hægt að leggja söfnuninni lið með því að leggja inn á reikning 1151-26-3500, kt. 530269-2649.