Rekstraraðilar veitingastaðarins Gullfoss Seafood & Grill í Reykjavík hafa ákveðið að lækka verð á öllum matseðlum og vínseðli um 10 prósent. Hvetja þeir öll íslensk fyrirtæki til að endurskoða verðlista sína.

Í tilkynningu frá veitingastaðnum segir að flestir birgjar hafi lækkað verð og þar með gefið ákveðið svigrúm til lækkunar. Aðalástæðan fyrir verðlækkuninni sé hins vegar sú að rekstraraðilarnir vilji skora á öll íslensk fyrirtæki til þess að lækka verð. Krónan hafi styrkst og launþegar tekið á sig launastopp og launalækkanir. Auk þess hafi húsnæði lækkað.

„Ef allir gera það sem þeir geta og leggjast á eitt, sama hversu lítið það er, telur það allt í vísitölunni. Ef við lækkum vísitöluna með sameiginlegu átaki allrar þjóðarinnar komumst við mun hraðar út úr þeim ógöngum sem við erum í núna.“