Frá fundi Kvennahreyfingar Samfylkingarinnar í gærkvöldi.

Á ársfþingi Kvennahreyfingar Samfylkingarinnar í gærkvöldi var samþykkt ályktun þar sem lýst er ánægju með störf Samfylkingarinnar í ríkisstjórn undir forystu Jóhönnu Sigurðardóttur, fyrsta kvenforsætisráðherra Íslands. 

„Kvennahreyfingin  telur  brýnt að  eftir kosningar verði mynduð félagshyggjustjórn sem  hefur það að markmiði að ganga til aðildarviðræðna við Evrópusambandið, endurreisa atvinnulífið og tryggja velferð  allra í samfélaginu.  Kvennahreyfingin telur  einnig mikilvægt að standa vörð um hag láglaunakvenna  í þeim breytingum sem fyrirhugaðar eru í rekstri hins opinbera og huga að því að skapa störf jafnt fyrir konur sem karla í þeirri uppbyggingu sem framundan er," segir m.a. í ályktuninni,

Þá er Ingibjörgu Sólrúnu Gísladóttur, sem lætur af formennsku á landsfundi Samfylkingarinnar um helgina, þakkað fyrir framlag hennar til íslenskra stjórnmála og kvennabaráttu.  Hún hafi unnið glæsta sigra fyrir félagshyggjufólk á Íslandi og breytt inntaki íslenskra stjórnmála.

Á ársþinginu var kjörin ný stjórn Kvennahreyfnigarinnar og  sitja nú 7 konur í stjórn, í stað 6 áður. Steinunn Valdís Óskarsdóttir er áfram formaður hreyfingarinnar.