Héraðsdómur Reykjavíkur. mbl.is/Þorkell

Héraðsdómur Reykjavíkur hefur dæmt karlmann á fimmtugsaldri í 4 mánaða skilorðsbundið fangelsi fyrir líkamsárás á fyrrum sambýliskonu sína. Maðurinn var einnig dæmdur til að greiða konunni 400 þúsund krónur í bætur. 

Árásin var gerð í janúar 2007 á heimili fólksins. Maðurinn var ákærður fyrir að hafa tekið konuna hálstaki og slegið höfði hennar í vegg og slegið hana margsinnis í líkamann á herbergisgangi íbúðarinnar, þannig að hún féll við. Síðan hafi hann sparkað í konuna liggjandi.

Maðurinn neitaði sök en viðurkenndi að komið hefði til átaka milli hans og konunnar. sagðist hann hafa verið að verjast konunni og hún hefði meiðst við að ganga á dyrastaf, sennilega viljandi til að verða sér út um áverka. Dómurinn lagði hins vegar framburð konunnar um átökin til grundvallar og vísaði m.a. til framburðar vitna um ástand konunnar á eftir.

Þetta er í annað skipti sem mál þetta kemur til kasta héraðsdóms. Maðurinn var í árslok dæmdur í 8 mánaða fangelsi fyrir árásina en Hæstiréttur ógilti dóminn og vísaði málinu á ný heim í hérað.

Konan flutti til landsins frá Venesúela gagngert til þess að hefja sambúð með manninum. Fjallað var um mál þetta í Morgunblaðinu árið 2007 en þar sagði konan að maðurinn, sem er flugstjóri fraktflugvélar, hefði smyglað sér inn í landið en konan er frá Venesúela og býr þar nú. Lögreglan á Suðurnesjum hóf í framhaldi af viðtalinu rannsókn á meintu smygli en rannsókninni var hætt.