Viðbygging við íþróttahús Íþróttafélags fatlaðra í  Reykjavík var tekin í notkun  við formlega athöfn klukkan tvö í dag. Á meðal gesta við opnunina voru Ólafur Ragnar Grímsson, forseti Íslands, Kartín Jakobsdóttir menntamálaráðherra og Hanna Birna  Kristjánsdóttir, borgarstjóri í Reykjavík. 

Fram kom við athöfnina að opnun íþróttahússins ætti  sér langan aðdraganda en Íþróttafélag fatlaðra í Reykjavík var stofnað 30. maí 1974. Íþróttahús Íþróttafélags fatlaðra var síðan vígt 27. september 1990. 

Skipuð var byggingarnefnd vegna viðbyggingar íþróttahússins árið 2005 og 9. júní 2006 var skrifað var undir samning við Reykjavíkurborg  um að borgin mundi leggja félaginu til 75 milljónir á árunum 2007. 2008 og 2009. Var það  áætlaður um helmingur byggingakostnaðar.

Félagsmálaráðherra samþykkti síðan árið 2006 að veita 10 milljónum úr framkvæmdasjóði fatlaðra til byggingarinnar.  

Félagið fékk einnig 10 milljónir til byggingarinnar í  fjárlögum 2007, 20 milljónir á fjárlögum 2008 og 20 milljónir í fjáraukalögum 2008 til byggingarinnar.

Þá hefur félagði fengið styrki til tækjakaupa í nýjan þreksal frá Minningasjóði Margrétar Björgúlfsdóttur, Bandalagi Kvenna í Reykjavík og Pokasjóði.

Heildarkostnaður vegna byggingarinnar  liggur ekki endanlega fyrir, en með tækjakaupum er áætlað að heildarkostnaðurinn verði a.m.k. 140 til 150 milljónir króna.

Stefnt er að því að ráðast næst í byggingu stærri félagsaðstöðu við húsið en búið er að leggja drög að hönnun Félagsmiðstöðvar í tengslum við það.