Grunaðir um tilraun til tryggingasvika
Héraðsdómur Reykjavíkur hefur sýknað Vátryggingafélag Íslands af bótakröfu manns, sem slasaðist þegar hann ók bíl á vegg í bílageymslu í Kópavogi. Fram kemur í dómnum að grunur leikur á, að maðurinn hafi vísvitandi ekið bílnum á vegginn í þeim tilgangi að svíkja út tryggingafé.
Þetta gerðist um nótt í apríl 2004. Ökumaður bílsins og farþegi voru fluttir á slysadeild eftir áreksturinn. Grunur lék á að mennirnir væru undir áhrifum einhverra efna og hafði lögregla eftir ökumanninum að hann hefði tekið rítalín og eftir farþeganum að hann hefði reykt hass. Ökumaðurinn kannaðist hins vegar ekki við þetta fyrir dómi.
Í dómnum kemur fram, að grunur hafi fljótlega vaknað um að áreksturinn hafi verið sviðsettur. Tveir menn, sem óskuðu nafnleyndar, höfðu samband við lögreglu og sögðust hafa vitneskju um að áreksturinn hefði verið viljaverk í þeim tilgangi að svíkja út tjónabætur hjá tryggingafélagi.
Þá lágu einnig fyrir upplýsingar, sem lögreglan hafði fengið með símhlerunum vegna annars óskilds máls. Hafði sími fyrrverandi eiganda bílsins verið hleraður og í samtölum hans kom fram, að hann ætli að láta þann, sem síðar lenti í árekstrinum, kaupa bílinn af sér í þeim tilgangi að eyðileggja hana þannig að hann fái bætur samkvæmt kaskótryggingu.
Það gekk eftir, ökumaðurinn keypti bílinn og yfirtók veðskuldir á bílnum. Fyrir dómnum lágu útprentanir af símtölum þess sem seldi bílinn og þess sem keypti þar sem seljandinn er að ýta á kaupandann að framkvæma eitthvað það sem hann hafi lofað að gera og tengist bifreið.
Ökumaðurinn slasaðist í árekstrinum en tryggingafélagið viðurkenndi ekki bótaábyrgð, m.a. á þeirri forsendu að ökumaðurinn hefði sjálfur valdið tjóninu með stórkostlegu gáleysi. Hann hefði ekið, undir áhrifum örvandi lyfja, á 45-50 km hraða niður í bifreiðageymslu í gegnum göng þar sem veggur á báða kanta aðgreinir einbreiða innkeyrsluna og útsýni var takmarkað, sérstaklega um miðnætti í apríl þar sem er myrkur, lítil lýsing, skýjað, regn og yfirborð vegar slétt og blautt.
Héraðsdómur tekur undir þetta og segir að akstursmáti ökumannsins hafi raunar verið með ólíkindum þegar mið sé tekið af aðstæðum. Hafnaði dómurinn því kröfu mannsins um að bótaskylda tryggingafélagsins yrði viðurkennd. Var maðurinn jafnframt dæmdur til að greiða 300 þúsund krónur í málskostnað.
