Málflutningur um frávísunarkröfu Jóns Ásgeirs Jóhannessonar, Kristínar systur hans, Tryggva Jónssonar og fjölskyldu- og fjárfestingafélagsins Gaums fer fram 4. maí nk. í Héraðsdómi Reykjavíkur. Það var ljóst við fyrirtöku í málinu sem fram fór í gær.

Lítið var að gert í málinu í gær. Helgi Magnús Gunnarsson, saksóknari efnahagsbrota, lagði fram greinargerð sína vegna frávísunarkröfunnar og í kjölfarið var dagsetning málflutnings ákveðin. Líkt og áður í Baugsmálum munu verjendur sakborninga skipta með sér verkum til að ekki verði mikið um endurtekningar í málflutningnum.

Sakarefnið er meiriháttar brot gegn skattalögum á árunum 1998 til 2002, en rannsókn á bókhaldi og skattskilum Baugs hófst í nóvember 2003. Baugur fékk svo afhenta endurálagningu frá ríkisskattstjóra fyrir árin 1998 til 2002 hinn 31. desember 2004. Baugur greiddi 142 milljónir króna í janúar 2005 vegna þessa.

Málinu svipar til máls ákæruvaldsins á hendur athafnamanninum Jóni Ólafssyni en hann var sýknaður á þeim forsendum að honum hefði verið gerð refsing með endurálagningu. Taldi dómurinn að álag á vantalda skattstofna yrði talið refsing í skilningi samningsviðauka við mannréttindasáttmála Evrópu. Dómurinn var kærður til Hæstaréttar og vísað frá vegna formgalla.