Samningur var gerður í gær milli Íslenskra aðalverktaka (ÍAV) og Austurhafnar um áframhaldandi byggingu Tónlistarhússins. Samningurinn var gerður með fyrirvara um að ríki og borg gangi endanlega frá fjármögnun verksins en það hefur tafist hjá ríkisbönkunum, sem unnið hafa í sambankaláni hér innanlands.

Hefði þessi samningur ekki verið gerður, hefðu Íslenskir aðalverktakar orðið að hægja á framkvæmdum og jafnvel segja upp starfsfólki núna um mánaðamótin. Um 150 manns hafa unnið þarna á síðustu vikum en sem kunnugt er stöðvuðust framkvæmdir um síðustu jól þar sem aðstandendur verksins komust í þrot.

„Þetta er yfirferð á nokkrum breytingum sem þótti nauðsynlegt að gera en samningurinn gerir áfram ráð fyrir að framkvæmdum verði lokið í febrúar árið 2011,“ segir Stefán Hermannsson, framkvæmdastjóri Austurhafnar, um samninginn.

Hann segir það aðeins spurningu um daga að gengið verði endanlega frá öllum samningum, sem síðan þurfa að fara fyrir ráðuneyti og borgaryfirvöld. Fer málið að öllum líkindum fyrir borgarráð á morgun.

Stefán segir töfina á málinu vissulega vera orðna bagalega en borgarstjóri og menntamálaráðherra undirrituðu viljayfirlýsingu 19. febrúar sl. um að hefja framkvæmdir við Tónlistarhúsið á nýjan leik, en þær stöðvuðust í lok síðasta árs. Áætlanir gera ráð fyrir að 13-15 milljarða króna kosti að ljúka byggingu Tónlistar- og ráðstefnuhússins.