Friðrik Tryggvason

Hæstiréttur hefur sýknað karl og konu, sem ákærð voru fyrir  umboðssvik með því að nýta sér kerfisvillu í netbanka Glitnis. Þar hafði kaup- og sölugengi gjaldeyris víxlast og græddi karlmaðurinn rúmar 24 milljónir á því en konan tæpar 350 þúsund krónur.

Hæstiréttur segir í dómunum, að  fólkið hafi eins og aðrir viðskiptavinir, sem fengust við gjaldeyriskaup í netbankanum, fengið tilboð Glitnis um tiltekið verð á gjaldeyrinum, sem það samþykkti. Væri ekki talið að fólkið hefði með þessu misnotað einhliða aðgang sinn að netbankanum við gjaldeyrisviðskiptin

Málið kom upp í maí árið 2007 en þá voru þrír karlmenn og ein kona ákærð fyrir að nýta sér kerfisvilluna. Fólkið aflaði sér samtals um 30 milljónir króna með því að kaupa dollara fyrir evrur og selja dollarana síðan strax aftur fyrir evrur. Alls voru færslurnar um fimm þúsund talsins.

Allt var fólkið sakfellt í Héraðsdómi Norðurlands eystra árið 2007. Tveir karlmannanna áfrýjuðu dómnum til Hæstaréttar, sem sýknaði þá í júní í fyrra. Í kjölfarið sóttu karlmaðurinn og konan, sem eftir voru, um endurupptöku málsins og féll dómur í Hæstarétti í dag á sama hátt og í málum mannanna tveggja í fyrra.

Fram kom, þegar Hæstaréttardómurinn féll í fyrra, að fólkið bauðst til þess að skila Glitni peningunum strax og lögregla hóf rannsókn á málinu. Féð var um tíma í vörslu rkislögreglustjóra en því var skilað til Glitnis á fyrri hluta síðasta árs.