Reykjavíkurborg ætlar að leita samstarfs við ríkisvaldið, Vinnumálastofnun, Samtök iðnaðarins og aðra vegna sérstaks atvinnuátaksverkefnis til að hefja uppbyggingu og endurgerð sögufrægra eldri húsa í Reykjavík. Óskar Bergsson formaður borgarráðs segir að átakið verði byggt á reynslu Svía af svokölluðu Halland verkefni. Tillaga þessa efnis verður flutt í borgarstjórn nk. þriðjudag.

Halland verkefnið var kynnt á námsstefnu sem haldin var á Hótel Sögu í gær og sóttu hátt á annað hundrað manns námsstefnuna sem fjallaði um vinnumarkaðsaðgerðir. Námsstefnan var haldin að tilstuðlan Reykjavíkurborgar og félags- og tryggingamálaráðuneytisins í samvinnu við fleiri aðila. Christer Gustafsson, stofnandi og stjórnarmeðlimur Halland-verkefnisins kom hingað til lands í boði Reykjavíkurborgar til að kynna verkefnið á námsstefnunni en það gaf góða raun í Svíþjóð í byrjun níunda áratugarins.

Í fyrirlestri Gustafssons kom fram að í efnahagsþrengingum sem upp komu í Svíþjóð árið 1993 var farið af stað með atvinnuskapandi verkefni sem fólst í því að kenna atvinnulausum iðnaðarmönnum handbragð við að varðveita gömul hús. Áður en verkefnið fór af stað voru tíu iðnaðarmenn sérmenntaðir í handbragði við að varðveita gömul hús, en í dag eru þeir um 1100 talsins. Verkefnið hlaut alþjóðalega athygli og hefur það verið útfært í Eystrasaltsríkjunum undir nafninu Balcon. Verkefnið var tilnefnt af Sameinuðu þjóðunum sem eitt af hundrað fyrirmyndaverkefnum árið 2002.

Óskar Bergsson, formaður borgarráðs segir að átakið verði með svipuðu sniði og það sænska og markmiðið verði að treysta menningarauð borgarinnar í gegnum endurbyggingu, viðhald og verndun mikilvægra húsa í Reykjavík.

„Með verkefninu geta skapast störf, samhliða því sem hægt verður að auka á menntun og reynslu fagstétta á borð við arkitekta, verkfræðinga og iðnaðarmenn við endurgerð gamalla íslenskra húsa.“