mbl.is/Eggert Jóhannesson

Lokahátíð Íþróttavakningar framhaldsskóla var haldin í Smáranum og Fífunni Kópavogi í dag. Þar sem körfuboltakeppnin gat ekki farið fram af óviðráðanlegum ástæðum fékkst ekki úr því skorið hvaða skóli verður Íþróttaskóli ársins 2009. Munu endanleg úrslit því ekki liggja fyrir fyrr en eftir páska.

Eftir keppni dagsins leiðir Menntaskólinn að Laugarvatni keppnina með 164 stig. Næstur er Fjölbrautarskóli Snæfellinga með 140 stig og þriðji í röðinni er Menntaskólinn í Reykjavík með 137 stig. Keppt var í futsal - innanhúsfótbolta með þyngri bolta, frjálsum íþróttum, sundi og blaki.

Úrslitadagurinn var endapunktur á heilsueflingarátaki sem hefur staðið yfir í allan vetur og snýst um að hvetja nemendur til aukinnar hreyfingar og efla með því forvarnir í framhaldsskólum. Er Íþróttavakningunni skipt í almenningshluta, sem vegur 40%, og keppnishluta, sem vegur 60%. Markmiðið er að hvetja framhaldsskólanemendur til að hreyfa sig meira og alls hafa um 8.000 nemendur víðs vegar af landinu tekið þátt í átakinu, sem verður árlegt upp frá þessu.

Ráðherrar mennta- og heilbrigðismála settu hátíðina en síðan var hitað upp í LazerTag og hreystibraut þar sem nemendur kepptu við kennara og ráðherrarnir öttu kappi í hreystibrautinni.

Í kjölfar þess var keppt í fótbolta, blaki, sundi og frjálsum íþróttum.

Nánar um íþróttavakningu framhaldsskólanna