Málþing Rjóðurs, sem er hvíldar- og endurhæfingarheimili fyrir langveik og langveik fötluð börn, skorar á félagsmálaráðuneyti og heilbrigðisráðuneyti að hefjast strax handa við að bæta aðstæður ungra langveikra einstaklinga frá 18 ára aldri. Bent er á að engin framhaldsúrræði eru fyrir hendi.

Málþingið var haldið í tilefni að fimm ára afmæli Rjóðurs, þann 1. apríl sl.. Bar það yfirskriftina „Hvernig hefur Rjóður skilað hlutverki sínu?“ og voru ráðstefnugestir sammála um að Rjóður hafi sannarlega sannað tilgang sinn. Bæði njóta börnin lífsgæða og öryggis í Rjóðri og fjölskyldur þeirra kærkominnar hvíldar frá bindandi og erfiðri umönnun.

Á málþinginu kom fram að knýjandi og síaukin þörf er á framhaldsúrræði fyrir börnin þegar þau ná 18 ára aldri og eiga ekki aðgang lengur að hvíldarinnlögnum í Rjóðrið. Ekkert slíkt úrræði er fyrir hendi og sex börn sem eru eða eru að verða 18 ára eiga nú enga möguleika á hvíldarinnlögnum. Um er að ræða einstaklinga sem þurfa mikla hjúkrun og umönnun allan sólarhringinn.

Á málþinginu kom fram að byggja þurfi upp heimili í tengslum við Rjóður og brýnt að ráðast þegar í verkefnið. Því skorar málþingið á ráðuneytin tvö að beita sér.