Hæstiréttur Íslands. mbl.is/Brynjar Gauti

Hæstiréttur hefur staðfest úrskurð Héraðsdóms Reykjavíkur þess efnis að sálfræðingur verður leiddur fyrir rétt sem vitni til að staðfesta vottorð sitt í kynferðisbrotamáli. Málið var höfðað á hendur karlmanni fyrir kynferðisbrot gegn þroskaheftum ungum pilti frá fyrstu mánuðum ársins 2006 til aprílmánaðar 2008. Pilturinn var 13-15 ára þegar brotin áttu sér stað.

Verjandi mannsins mótmælti að sálfræðingur sem hafði piltinn til meðferðar yrði leiddur fyrir réttinn sem vitni og að vottorð hans yrði lagt fram sem skjal í málinu. Mótmælin voru tilkomin vegna þessa að daginn fyrir þingfestingu var sálfræðingnum bætt við vitnalista. Kom fram að ekki hefðu fyrr legið fyrir upplýsingar um að sálfræðingurinn hefði komið að málinu.

Í vottorðinu er því lýst að pilturinn hefði sótt 15 viðtöl til sálfræðingsins að ósk Barnaverndarnefndar Reykjavíkur um að hann fengi sérfræðilega greiningu og meðferð vegna gruns um að hann hefði sætt kynferðislegu ofbeldi af hendi mannsins. Lýsir hún þar niðurstöðum sjálfsmatskvarða og greinir frá því að viðtölin hafi leitt í ljós fjölmörg vandamál hjá brotaþola sem þekkt séu meðal barna sem sætti hafi kynferðislegu ofbeldi í langan tíma.

Í niðurstöðum héraðsdóms, sem Hæstiréttur byggir á sínum dómi, segir að löng dómaframkvæmd sé fyrir því í kynferðisbrotamálum að lögð séu fram vottorð sálfræðinga og annarra sérfræðinga sem hafa fórnarlömb til meðferðar.

„Hafa gögn þessi verið talin nauðsynlegur og eðlilegur þáttur í því að upplýsa um afleiðingar hins meinta brots fyrir brotaþola og jafnvel til þeirra litið við mat á sök eða sakleysi ákærða. Eru og fjölmörg dæmi þess að slík vottorð hafi verið lögð fram undir rekstri máls, allt til aðalmeðferðar þess, auk þess sem dæmi er um að framlagning slíks vottorðs hafi verið heimiluð fyrir Hæstarétti án þess að það hafi áður verið lagt fram í héraði,“ segir í niðurstöðunni.

Greiddi fyrir með tölvuleikjum

Í ákæru gegn manninum kemur fram að hann hafi notfært sér þroskaskerðingu piltsins, reynsluleysi af kynlífi og tölvufíkn. Maðurinn greiddi fyrir kynmök með tölvuleikjum eða peningum. Brotin áttu sér oftast stað í bifreið mannsins í nágrenni við Hrafnistu í Hafnarfirði eða í bílskúr við heimili piltsins.