Ódýrara að veita námslán áfram

Kosta myndi sveitarfélögin um 4,68 milljarða kr. að veita 13 þúsund stúdentum fjárhagsaðstoð yfir sumartímann. Kostnaður við að hafa 13 þúsund námsmenn á námslánum væri um 3,9 milljarðar kr. sem síðar fást endurgreiddir með vöxtum og verðbótum. Þetta kemur fram í bréfi Stúdentaráðs HÍ til ráðherra.

Stúdentaráðið óskar þess að komið verði á sumarönnum við Háskóla Íslands, helst með tilheyrandi kennslu, en til vara með fjarnámi og ágústprófum.

„Samkvæmt könnun sem Stúdentaráð Háskóla Íslands gerði á dögunum blasir atvinnuleysi við tæplega 13.000 námsmönnum í sumar. Fái þessir stúdentar ekki tækifæri á sumarnámi eiga þeir ýmist rétt á atvinnuleysisbótum eða fjárhagsaðstoð frá sínu sveitarfélagi.

Í dag eru atvinnuleysisbætur um 150.000 kr. á mánuði eða 50% hærri en grunnframfærsla námslána. Fjárhagsaðstoð sveitarfélaga er á bilinu 115.000-120.000 á mánuði eða 15-20% hærri en grunnframfærsla námslána. Það myndi því kosta sveitarfélögin um 4,68 milljarða að veita 13.000 stúdentum fjárhagsaðstoð yfir sumartímann. Kostnaður við að hafa 13.000 námsmenn á námslánum væri um 3,9 milljarðar sem síðar fást endurgreiddir með vöxtum og verðbótum,“ segir í bréfi Stúdentaráðs.

• 3 blogg um fréttina

Bloggað um fréttina

• Ingólfur Birgir Sigurgeirsson: Stúdentaráð finnur fjármagn til að halda sumarannir við Háskóla Íslands
• Guðrún Jóna Jónsdóttir: Staðan í dag!!
• Baldvin Jónsson: Borgarahreyfingin styður mjög eindregið hugmyndina um sumarskóla