Ögmundur Jónasson heilbrigðisráðherra mbl.is/Kristinn

Hækkun á einingaverði til sjálfstætt starfandi lækna upp á 9,02% sem taka átti gildi 1. apríl síðastliðinn hefur verið frestað til 1. júní nk.

Samkvæmt samningi Læknafélags Reykjavíkur og Tryggingastofnunar ríkisins sem undirritaður var 29. mars 2008 hækkaði einingaverð vegna lækninga utan sjúkrahúsa um 4,7%, úr 254 krónum einingin í 266 krónur. Jafnframt átti einingaverð að hækka um 9,02% þann 1. apríl sl. og verða 290 krónur.

Ögmundur Jónasson, heilbrigðisráðherra óskaði eftir því að læknar féllu frá þessari hækkun. Þeir höfnuðu því en féllust á að fresta hækkuninni til 1. júní nk. Samkomulag þar um var undirritað 25. mars sl.

Hækkun á einingaverði til sjálfstætt starfandi lækna bar á góma á fundi heilbrigðisráðherra með trúnaðarmönnum stéttarfélaga innan heilbrigðisþjónustunnar og formönnum stéttarfélaga innan Starfsgreinasambands Íslands og BSRB. Staða heilbrigðisþjónustunnar og framtíðarhorfur voru til umræðu.

Vilhjálmur Birgisson, formaður Verkalýðsfélags Akraness spurði Ögmund Jónasson á fundinum hvort ekki skyti skökku við að gengið hafi verið frá þessu samkomulagi við sjálfstætt starfandi lækna, á sama tíma og verið væri að skera niður í heilbrigðiskerfinu um 6,7 milljarða.

„Það liggur fyrir að hér er um tekjuhæstu einstaklingana innan heilbrigðiskerfisins að ræða. Þegar hækkunin í 290 krónur þann 1. júní nk. hefur tekið gildi þá hefur einingaverðið hækkað um 14% á rétt rúmu ári. Það er líka rétt að benda á að kjarasamningar ófaglærðra starfsmanna heilbrigðisstofnanna innan SGS runnu út 31. mars sl. og ljóst að þetta samkomulag mun klárlega gefa tóninn í þeim viðræðum sem nú standa yfir við fjármálaráðherra. Það er mín skoðun að það gangi ekki upp að ganga frá slíku samkomulagi á sama tíma og verið er að skera niður launakjör hjá ófaglærðum í umtalsverðum mæli,“ segir Vilhjálmur Birgisson, formaður Verkalýðsfélags Akraness.

Frétt á vef VLFA

Vilhjálmur Birgisson, formaður VLFA.