Óskað eftir lengri tíma til umræðu
Kristinn Ingvarsson
Sigurður Kári Kristjánsson, þingmaður Sjálfstæðisflokks, hefur óskað eftir því að lengri tíma verði varið í að fjalla um skýrslu fjármálanefndar breska þingsins um áhrif aðgerða breska stjórnarinnar á fall íslensku bankanna sem ráðgert er að fram fari í utandagskrárumræðum á Alþingi í dag kl. 14:30.
Málshefjandi umræðunnar er Kristrún Heimisdóttir, en Steingrímur J. Sigfússon fjármálaráðherra verður til andsvarar.
Kjartan Ólafsson, þingforseti, upplýsti Sigurð Kára um það að ákveðið hefði verið að verja aðeins hefðbundnum hálftíma í þessar utandagskrárumræður og ekki hvikað frá þeirri ákvörðun.
Árni M. Mathiesen, þingmaður Sjálfstæðisflokks, kvaddi sér hljóð í upphafi þingfundar í dag til þess að þakka fyrir að loks hefði verið boðað til fundar í umhverfisnefnd í gærkvöldi eftir að meirihlutinn hefði kallað eftir slíkum fundi í fimm daga. Sagðist hann ekki vilja deila meira við formann og varaformann nefndarinnar um það hvers vegna ekki hefði verið boðað til fundar fyrr.
Atli Gíslason, þingmaður Vinstrihreyfingarinnar - græns framboðs, sagði ljóst að málsmeðferðin í „hinu stóra umhverfisnefndarmáli“ hafi verið algjörlega eðlileg. Sagðist hann hafa boðist til þess að halda fundinn í veikindafjarveru formanns nefndarinnar, en sá ekki talið ástæðu til þess þar sem hann taldi sig aðeins myndu vera fjarverandi í skamman tíma vegna veikinda.
Atli sagði ályktunina um losun gróðurhúsalofttegunda, sem meirihluti er fyrir meðal sjálfstæðis- og framsóknarmanna, vera óþarfi þar sem ljóst væri að Ísland verði líkt og aðrar þjóðir að draga saman í losun gróðurhúsalofttegunda.
Helgi Hjörvar, þingmaður Samfylkingarinnar, sagði rétt að fara yfir það og skýra hvernig afgreiða ætti beiðnir um fundir í nefndum. Sagði hann allan gang á því hvernig á því væri tekið. Sagði hann einnig ágætt að skerpa á því hvað sé þingleg meðferð. Taldi hann það ekki vænlegt að Ísland, eitt iðnríkja, fari fram á að fá að menga meira.
Kristinn H. Gunnarsson, þingmaður utan flokka, sagði það sér mikil vonbrigði að þeir sem áður gagnrýndu meirihlutann fyrir valdhroka séu sjálfir byrjaðir að haga sér með nákvæmlega sama hætti og þeir sem þeir gagnrýndu.
Mörður Árnason, þingmaður Samfylkingarinnar, undraði sig á því að flutningsmenn þingsályktunartillögu um hvalveiðar skuli ekki hafa óskað eftir því umræða um þær fari fram á Alþingi. Sakaði hann flutningsmenn fyrir að beita hvalveiðum fyrir sér til þess að afla sér vinsælda heima í héraði.
Illugi Gunnarsson, þingmaður Sjálfstæðisflokks, sagði það mikilvæga íslenska hagsmuni að tillaga meirihluta umhverfisnefndar verði rædd á Alþinigi. Þorgerður Katrín Gunnarsdóttir, þingmaður Sjálfstæðisflokks, tók undir með Illuga og sagði mikilvægt m.a. með tilliti til atvinnuuppbyggingar hérlendis að tillagan yrði samþykkt. Sagðist hún sannfærð um að hægt verði að sannfæra meirihluta þingsins að þessir hagsmunir séu ekki aðeins hagsmunir Íslands heldur heimsins alls. Kallaði hún einnig eftir því að þingsályktunartillaga um hvalveiðar fáist ræddar á þinginu. „Þetta eru tillögur í atvinnuskyni, sem fást ekki ræddar hér á þingi. Þingmenn Samfylkingar og VInstri grænna eru á móti því að atvinnumál komist á dagskrá,“ sagði Þorgerður Katrín.
„Við eigum að virkja eins og við mögulega getum hér á Íslandi mannkyni til hagsbóta, því þetta er jú bara einn hnöttur,“ sagði Pétur Blöndal, þingmaður Sjálfstæðisflokks. Sagði hann framleiðslu rafmagns á Íslandi mun umhverfisvænni en framleiðsla rafmagns í Kína með því að brenna kolum.
