Katrín Jakobsdóttir. Árni Sæberg

Katrín Jakobsdóttir menntamálaráðherra segir ríkisstjórnina vera að gera allt sem í hennar valdi stendur til þess að koma til móts við námsmenn vegna fyrirsjáanlegs atvinnuleysis í sumar. Unnið hefur verið að útfærslu tillagna að hálfu iðnaðar-, menntamála-, fjármála-, og forsætisráðherra.

„Við [í menntamálaráðuneytinu innsk. blm.] höfum verið að vinna að úrlausn þessara mála í samvinnu við iðnaðarráðuneytið. Meðal annars er horft til þess að útvinna námsmönnum atvinnu, en það er ljóst að það verður ekki hægt að koma til móts við alla,“ sagði Katrín í samtali við mbl.is.

Meðal þess sem hefur verið rætt um er að efla nýsköpunarsjóð námsmanna. Tillögur verða kynntar forsvarsmönnum háskólanna og stúdentum strax eftir páska, segir Katrín.

Kannanir sem gerðar hafa verið á atvinnuhorfum stúdenta benda til þess að erfitt verði fyrir stóran hluta þeirra, það er háskóla- og framhaldsskólanema, að fá vinnu í sumar vegna niðursveiflu í efnahagslífi í landsins í kjölfar hruns bankanna. Miðað við niðurstöðu könnunar Stúdentaráðs eru að a.m.k. 10 þúsund háskólanemar sem verða í erfiðleikum með að fá vinnu. Hjá framhaldsskólanemum, sem í heild eru um 29 þúsund í landinu, er staðan einnig slæm en talið er að stór hluti þeirra verði í erfiðleikum með að fá vinnu í sumar.

Það sem helst veldur erfiðleikum við að finna lausn á málinu, er að kostnaður ríkisins við að bjóða upp á lánshæft nám í sumar er umtalsverður og getur hlaupið á milljörðum, þrátt fyrir stór hluti lánanna sé greiddur til baka. Þá er réttur stúdenta til atvinnuleysisbóta misjafn. þeir sem ekki eigi rétt á bótum geta leitað til sveitarfélaga sinna og fengi framfærslustyrk sem eru um 15 til 20 prósent hærri en atvinnuleysisbæturnar.